साळवाडी- शिरोली रस्त्याची दुरवस्था

आळेफाटा, ता. २२ ः साळवाडी ते शिरोली या रस्त्याची दुरवस्था झाली असून, या रस्त्याच्या दुरुस्तीची मागणी या परिसरातील नागरिकांनी सार्वजनिक बांधकाम विभागाकडे केली आहे.
साळवाडी ते शिरोली (ता. जुन्नर) या रस्त्याची दुरवस्था झाली आहे. या दोन गावांमधील अंतर फक्त तीन किलोमीटर आहे. परंतु, हे तीन किलोमीटर अंतर पार करायला प्रवासी व ग्रामस्थांना सुमारे एक तासाहून अधिक वेळ लागत आहे. तसेच, या रस्ता अतिशय रुंद असून, दोन्ही बाजूला मोठी झाडे- झुडपे आहेत. तसेच, या रस्त्यावर अनेक ठिकाणी वळणे आहेत. तसेच, या रस्त्यावर मोठ खड्डे देखील आहेत. त्‍यातच आणखी भर म्हणून शेतकऱ्यांनी जलवाहिनीसाठी रस्ता खोदल्याने वाहनचालक व प्रवाशांना त्रास सहन करावा लागत आहे. तसेच, येथील ग्रामस्थांनी सार्वजनिक बांधकाम विभागाकडे या रस्त्याच्या दुरुस्तीबाबत वारंवार पत्रव्यवहार केला आहे, तरीही या रस्त्याच्या कामाला सुरुवात कधी होणार? असा प्रश्न येथील ग्रामस्थ, प्रवाशांना पडला आहे.

नागरिकांचा आंदोलनाचा इशारा
या रस्त्यावर असणाऱ्या खड्ड्यांमुळे वारंवार अपघात होत आहेत. तसेच, सध्या ऊस तोडणी चालू झाली आहे. हा रस्ता अरुंद असल्याने जड वाहने रस्त्याच्या खाली उतरत नाहीत. यामुळे समोरून येणारे वाहणे व जड वाहतूक करणारे चालक यांच्यामध्ये भांडणे होतात. तरी तरी या रस्त्याचे काम लवकरात लवकर पूर्ण करावे, अन्यथा लवकरच रास्ता रोको आंदोलन केले जाईल, असा इशारा या स्थानिक नागरिकांनी दिला आहे.

साळवाडी ते शिरोली या रस्त्याची दुरवस्था झाली असून, याची दुरुस्ती करण्यात यावी, यासाठी सार्वजनिक बांधकाम विभागाकडे वारंवार मागणी करूनही अद्याप या कामाला सुरुवात झालेली नाही. या कामाला सुरुवात न केल्यास आंदोलन करण्यात येईल
- सुनील जाधव‌, ग्रामस्थ.