टोल चुकविणाऱ्या वाहनांमुळे चाळकवाडीकरांना त्रास

आळेफाटा, ता. ३ : चाळकवाडी (ता. जुन्नर) टोलनाक्याचा टोल चुकविणाऱ्या वाहनांमुळे ग्रामस्थांना मोठा मनस्ताप सहन करावा लागत आहे. पुणे नाशिक महामार्गावर मोठ्या प्रमाणात वाहनांची वर्दळ असते. त्यातच टोल चुकविण्यासाठी वाहने पर्यायी मार्गाचा वापर म्हणून गावठाण, शिंदे बाम्हणेमळा, वामनपट्टा येथील रस्त्याचा वापर करत आहेत. गावठाणात जिल्हा परिषद प्राथमिक शाळा माध्यमिक विद्यालय व मागासवर्गीय विद्यार्थ्याचे वसतीगृह आहे. या ठिकाणी जवळपास २०० विद्यार्थी शिक्षण घेत आहेत. येथे टोल चुकविणाऱ्या वाहनांची कायमच वर्दळ असते. त्यांना याबाबत जाब विचारला तर उलटसुलट उत्तरे दिली जातात. चाळकवाडी अंतर्गत येणारा रस्ता हा कच्चा रस्ता असल्यामुळे रस्त्यावर मोठमोठे खड्डे पडत आहेत. तसेच पावसाळ्यात या रस्त्यावर मोठ्या प्रमाणात चिखल होतो. टोल चुकविण्याच्या प्रयत्नात जर अपघात झालाच तर त्याला जबाबदार कोण? असा प्रश्न ग्रामस्थांनी उपस्थित केला आहे. त्यामुळे टोल वाचविणाऱ्या वाहनांवर ग्रामपंचायत पोलिस व टोल प्रशासनाकडून संयुक्तरीत्या कारवाई करण्यात यावी अशी मागणी ग्रामस्थांनी केली आहे.