गणेशोत्सव, बकरी ईद शांततेत पार पाडण्यासाठी पथसंचलन

आळेफाटा, ता. २३ : गणेशोत्सव व बकरी ईद हे सण शांततेत पार पडावा, यासाठी आळेफाटा पोलिस ठाण्याच्या पोलिस दलाच्या वतीने आळेफाटा परीसरातील गावांमध्ये पथसंचलन करण्यात आले.
येणारा गणपती उत्सव व येणारी बकरी ईद हे सण शांततेत पार पडावेत यासाठी जुन्नर तालुक्याच्या पूर्व पट्ट्यातील आळेफाटा पोलिस ठाण्याच्या हद्दीतील आळे, राजुरी, बेल्हे तसेच इतर गावांमध्ये आळेफाटा पोलिस ठाण्याचे पोलिस निरीक्षक विश्वास जाधव यांच्या मार्गदर्शनाखाली आळेफाटा पोलिस ठाण्यातील पोलिसांच्या वतीने पथसंचलन केले.
गणेशोत्सव शांततेत पार पडावा, यासाठी तसेच या उत्सवाच्या काळात कुठलाही गैरप्रकार होऊ नये तसेच गुन्हेगारीला आळा बसावा व सर्वच परिसरात जातीय सलोखा अबाधित राहावा, यासाठी पथसंचलनाचे आयोजन केले होते. या पथसंचलनात आळेफाटा पोलिस ठाण्याचे कर्मचारी व राज्य राखीव दलाचे जवान तसेच होमगार्ड आदींचा समावेश होता.