बोरी बुद्रुक- आळेफाटा रस्त्याची दुरवस्था

आळेफाटा, ता. ४ ः बोरी बुद्रुक ते आळेफाटा (ता. जुन्नर) या रस्त्याची खड्ड्यांमुळे मोठ्या प्रमात दुरवस्था झाली आहे. या रस्त्यावरून वाहन चालविताना वाहनचालकांना मोठी कसरत करावी लागत आहे. त्यामुळे रस्त्याच्या दुरुस्तीची मागणी नागरिक व वाहनचालकांनी केली आहे.
आळेफाटा येथे मोठी बाजारपेठ असल्याने या ठिकाणी ये- जा करण्यासाठी बोरी बुद्रुक या गावाच्या परिसरातील जाधववाडी, शिरोली, सुलतानपूर तांबेवाडी, माळवाडी, साळवाडी आदी गावांमधील ग्रामस्थांना याच रस्त्याचा वापर करावा लागतो. बोरी बुद्रुक ते आळेफाटा या दोन गावांमधील अंतर सुमारे सहा किलोमीटरचे आहे.
या रस्त्यावर ठिकठिकाणी मोठे खड्डे पडलेले आहेत. हे खड्डे चुकविण्याच्या नादात अनेकवेळा छोटे मोठे अपघात होत आहेत. त्यातच येथील काही ग्रामस्थांनी रस्ता खोदून जलवाहिन्या केल्या आहेत. मात्र, हे काम झाल्यानंतर त्यांनी रस्त्यावर वरच्यावर माती टाकून, तसेच सोडून दिलेले आहे. यामुळे या ठिकाणी वाहने जाऊन मोठे खड्डे पडले आहेत. त्यामुळे अपघात होण्याची शक्यता आहे. तसेच, या रस्ता अरुंद असल्यामुळे दोन वाहने समोरासमोर आली तर खाली कोणी उतरायचे यावरून वाहनचालकांमध्ये अनेकवेळा वाद होत आहेत. त्यामुळे या रस्त्याची दुरुस्ती व रुंदीकरण लवकरात लवकर करावी, अशी मागणी या परिसरातील नागरिकांनी केली आहे.

06966