वडगाव आनंदमधील तरुण बिबट्याच्या हल्ल्यात जखमी

आळेफाटा, ता. ७ : वडगाव आनंद (ता. जुन्नर) येथे गुरुवारी (ता. ७) रात्री साडेनऊ वाजण्याच्या सुमारास बिबट्याने केलेल्या हल्ल्यात तरुण जखमी झाला.
याबाबत मिळालेल्या माहितीनुसार, वडगाव आनंद (ता. जुन्नर) येथील रानमळा येथे राहत असलेला प्रणव संदीप शिंदे (वय १९) हा तरुण मोटारसायकलवरून गुरुवारी रात्री साडेनऊ वाजण्याच्या सुमारास आळेफाटा येथील काम उरकून घरी येत असताना पिंपळगाव जोगे कालव्याजवळ आल्यानंतर अचानकपणे एका बिबट्याने त्याच्यावर हल्ला केला. त्याच्या हाताला चावा घेत गंभीर जखमी केले.
त्यामुळे तो मोठ्याने ओरडला. त्यावेळी बिबट्याने काही क्षणात या ठिकाणाहून पळ काढला. त्याच्यावर आळेफाटा येथील खासगी दवाखान्यात उपचारासाठी दाखल केले आहे. घटनास्थळी वन विभागाच्या अधिकाऱ्यांनी भेट दिली असून झालेल्या घटनेचा पंचनामा केला.
दरम्यान, राजुरी येथे सोमवारी एक विद्यार्थी बिबट्याच्या हल्ल्यातून थोडक्यात बचावला असतानाच शुक्रवारी पहाटेच्या सुमारास गावात एका मेंढपाळाच्या मेंढीवर हल्ला करून बिबट्याने ठार केले.