जुन्नरच्या पूर्व भागात बिबट्याची दहशत

आळेफाटा, ता. १४ : जुन्नर तालुक्याच्या पूर्व भागातील गावांमध्ये बिबट्याची दहशत वाढली आहे. दररोज या परिसरातील पाळीव प्राण्यांवर हल्ले होत आहेत. त्यामुळे या परिसरात भीतीचे वातावरण निर्माण झाले आहे.
याबाबत सविस्तर माहिती अशी की, जुन्नर तालुक्याच्या पूर्व भागातील राजुरी, बेल्हा, बोरी बुद्रुक, साळवाडी, जाधववाडी, उंचखडक, आळेगाव संतवाडी, वडगाव आनंद, वडगाव कांदळी ही गावे बिबट्या प्रवण क्षेत्रात मोडत आहेत. राजुरी व बोरी बुद्रुक या दोन गावांमध्ये बिबट्यांची संख्या अधिक आहे. विशेष म्हणजे राजुरी गावात गेल्या दोन महिन्यांत बिबट्याने १० ते १२ शेळ्या, मेंढ्या तसेच वासरांवर हल्ले करून फडशा पाडला आहे. तसेच गेल्या महिन्यात दोन व्यक्तींवर हल्ला करून जखमी केले आहे. दरम्यान, सध्या या परिसरात दिवसेंदिवस उसाचे क्षेत्र वाढले असून बिबट्यांना लपण्याची सोय मोठ्या प्रमाणात झाली आहे; परंतु या ठिकाणी असलेल्या बिबट्यांना कुठल्याही प्रकारचे खाद्य मिळत नसल्याने पाळीव प्राण्यांवर तसेच माणसांवर हल्ले करू लागले आहेत. तरी या ठिकाणी असलेल्या बिबट्यांना पकडण्यासाठी वन खात्याने पिंजऱ्यांची संख्या वाढवावी, अशी मागणी होत आहे.