‘आळेफाटा- बेल्हे मार्गावर मिनी बस सुरू करावी’

आळेफाटा, ता. ११ ः आळेफाटा ते बेल्हे या मार्गावरील बंद पडलेली मिनी बस पुन्हा सुरू करावी अशी मागणी राजुरी बेल्हे परिसरातील प्रवासी व ग्रामस्थांच्या वतीने करण्यात आली आहे. अहिल्यानगर-कल्याण महामार्गावरील आळेफाटा ते बेल्हे या प्रमुख व मोठ्या गावांमधील अंतर सुमारे पंधरा किलोमीटर आहे. या पंधरा किलोमीटर अंतरामध्ये आळे, राजुरी, गुंजाळवाडी, लवणवाडी ही गावे येतात. या दोन प्रमुख गांवाच्या अंतरामध्ये दोन शासकीय महाविद्यालये तसेच कनिष्ठ महाविद्यालय डी फार्मसी, बी फार्मसी, बीएड कॉलेज आहे. यामुळे या रोडवर विद्यार्थी व प्रवाशांची नेहमीच गर्दी असते.
गावामध्ये लांब पल्ल्याच्या एसटी बसेस थांबत नाही. त्यामुळे प्रवाशांना खासगी वाहनाने जादा पैसे देऊन प्रवास करावा लागत आहे. त्यातच या मार्गावरील खासगी वाहन चालक एका रिक्षामध्ये जास्त माणस भरतात. जादा शिट भरल्यामुळे वारवांर अपघात होत आहेत. गेल्या पाच ते सहा वर्षांपूर्वी या मार्गावर नारायणगाव आगाराची मिनी बस चालु होती. मिनीबसला चांगला फायदा व्हायचा पंरतु ही बस अचानक बंद करण्यात आल्यामुळे प्रवाशांचे हाल होत आहे. तरी बंद पडलेली मिनी बस पुन्हा सुरू करावी अशी मागणी माजी सभापती दिपक औटी यांनी केली आहे.