आळेफाटा चौकात कोंडीमुळे वाहनांच्या लांबच लांब रांगा

आळेफाटा, ता. २५ : नाशिक-पुणे महामार्गावरील आळेफाटा (ता. जुन्नर) येथे रविवारी (ता. २५) वाहनांच्या लांबच लांब रांगा लागल्या होत्या. सध्या लग्नसराई सुरू असल्याने दररोज वाहतूक कोंडी होत आहे.
दुचाकी, चारचाकी वाहनचालक वाहतूक नियमांकडे दुर्लक्ष करीत असल्याने कोंडीत वाढ होत आहे. वाहनचालक जशी जागा मिळेल तसा कोंडीतून मार्ग शोधत होते. दरम्यान, आळेफाटा पोलिस निरीक्षक विश्वास जाधव, सहायक पोलिस निरीक्षक अमोल पन्हाळकर तसेच इतर सहकारी सकाळी सात वाजल्यापासून रात्री उशिरापर्यंत वाहतूक सुरळीत करण्याचा प्रयत्न करीत होते. त्यामुळे प्रवाशांना काहीसा दिलासा मिळाला आहे.
नाशिक-पुणे महामार्गाच्या बाह्यवळण रस्त्याचे काम पूर्ण झालेले आहे. हा मार्ग वाहतुकीसाठी मोकळा केला असताना देखील मोठ्या प्रमाणावर वाहतुकीची कोंडी निर्माण झाली होती. आळेफाटा येथे अहिल्यानगर - कल्याण व पुणे- नाशिक या दोन राष्ट्रीय महामार्गावरील मध्यवर्ती ठिकाण असल्याने या ठिकाणी चारही बाजूंनी वाहने येत होती. यामुळे कोंडी वाढत होती. येथील चौकात सिग्नल बसविल्यास नाशिक -पुणे रोड व अहिल्यानगर- कल्याण रोड वर वाहनांची होणारी गर्दी काही प्रमाणात कमी होण्यास मदत होऊ शकेल, असे आशा प्रवाशांनी व्यक्त केली.