‘समर्थ’ संकुलात ‘सायबर सेक्युरिटी’, ‘डेटा सायन्स’ अभ्यासक्रमांना मान्यता

बेल्हे, ता. १८ : बेल्हे (ता. जुन्नर) येथील समर्थ शैक्षणिक संकुलातील समर्थ कॉलेज ऑफ कॉम्प्युटर सायन्स या पदवी महाविद्यालयामध्ये, नुकतीच बी.एस्सी (सायबर सेक्युरिटी)-प्रवेश क्षमता ८० आणि एम.एस्सी कॉम्प्युटर सायन्स (डेटा सायन्स)-प्रवेश क्षमता २४ हे दोन नवीन अभ्यासक्रम सुरू करण्यास शैक्षणिक वर्ष २०२५-२६ पासून महाराष्ट्र शासनाने परवानगी दिली आहे. अशी माहिती समर्थ शैक्षणिक संस्थेचे सचिव विवेक शेळके यांनी दिली.
विद्यार्थ्यांना हे अभ्यासक्रम पूर्ण केल्यानंतर रोबोटिक सायंटिस्ट, ए-आय इंजिनिअर, बिझनेस इंटेलिजन्स डेव्हलपर, रिसर्च सायंटिस्ट, बिग डेटा इंजिनिअर, ए-आय डेटा ॲनालिस्ट अशा विविध पदांवर काम करण्याची संधी उपलब्ध आहे. ई-कॉमर्स, आरोग्य, शिक्षण, सहकार व तंत्रज्ञान, ऊर्जा यांसारख्या अनेक क्षेत्रांमध्ये कुशल मनुष्यबळाची कमतरता आहे. ती कमतरता भरून काढण्यासाठी डेटा सायन्स व सायबर सेक्युरिटी हे अभ्यासक्रम सावित्रीबाई फुले पुणे विद्यापीठ अंतर्गत सुरू केले आहेत. उत्तर पुणे जिल्ह्यातील विद्यार्थी व पालक वर्गाच्या मागणीनुसार बदलत्या तंत्रज्ञानाची ओळख ग्रामीण भागातील विद्यार्थ्यांना व्हावी, या हेतूने हे दोन्ही नवीन अभ्यासक्रम सुरू करीत असल्याचे संस्थेचे विश्‍वस्त वल्लभ शेळके यांनी सांगितले. या अभ्यासक्रमांच्या प्रवेश प्रक्रियेसंदर्भात अधिक माहितीसाठी संस्थेत संपर्क साधण्याचे आवाहन संस्थेच्या वतीने केले आहे.