समर्थ संकुलामध्ये ‘बीएससी नर्सिंग’ला मान्यता

बेल्हे, ता. १४ : बेल्हे (ता. जुन्नर) येथे समर्थ शैक्षणिक संकुलातील समर्थ कॉलेज ऑफ नर्सिंगमध्ये नुकताच ‘बीएससी नर्सिंग’ हा नवीन अभ्यासक्रम शैक्षणिक वर्ष २०२५-२६ पासून सुरू करण्यास महाराष्ट्र शासन वैद्यकीय शिक्षण व औषधी द्रव्ये विभाग यांच्याकडून मान्यता मिळाल्याची माहिती संस्थेचे सचिव विवेक शेळके यांनी दिली.
विद्यार्थ्यांचा नर्सिंग अभ्यासक्रमाकडे वाढता कल पाहता या अभ्यासक्रमास प्रवेश घेणाऱ्या विद्यार्थी-विद्यार्थिनींची संख्या मोठ्या प्रमाणावर होती. त्या अनुषंगाने संस्थेला नर्सिंग अभ्यासक्रमाचे नवीन महाविद्यालय सुरू करण्यास परवानगी मिळाली आहे. हा अभ्यासक्रम महाराष्ट्र शासन वैद्यकीय शिक्षण व संशोधन मुंबई आणि महाराष्ट्र आरोग्य विज्ञान विद्यापीठ, नाशिक यांच्याशी संलग्न असणार आहे. या नवीन महाविद्यालयासाठी अत्याधुनिक रुग्णालय, सुसज्ज प्रयोगशाळा, विद्यार्थी व विद्यार्थिनींसाठी स्वतंत्र वसतीगृह तसेच जुन्नर, पारनेर, संगमनेर, अहिल्यानगर, खेड, आंबेगाव, शिरूर आदी प्रमुख महामार्गावरून संस्थेमार्फत बस गाड्यांची सुविधा उपलब्ध करण्यात आलेली आहे.
दरम्यान, बीएससी नर्सिंग या अभ्यासक्रमास प्रवेश घेण्यासाठी इंग्रजी, भौतिकशास्त्र, रसायनशास्त्र, जीवशास्त्र आदी विषयांसह १२ वी विज्ञान शाखेमध्ये खुल्या प्रवर्गासाठी किमान ४५ टक्के व इतर मागासवर्गीय प्रवार्गसाठी ४० टक्के गुण मिळवून उत्तीर्ण झालेले विद्यार्थी पात्र ठरणार आहेत. त्यासाठी एमएच नर्सिंग-२०२५ ची सीईटी परीक्षेस ५० टक्के गुण असणे बंधनकारक असल्याचे सांगण्यात आले. प्रवेशासंदर्भात अधिक माहितीसाठी संपर्क करण्याचे आवाहन संस्थेच्या वतीने करण्यात आलेले आहे.