नळवणेमध्ये बल्क कूलरचे उद्घाटन

बेल्हे, ता. २१ : नळवणे (ता. जुन्नर) येथे पुणे जिल्हा दूध उत्पादक संघाने उपलब्ध करून दिलेल्या पाच हजार लिटर क्षमतेच्या बल्क कूलरचे उद्घाटन सोमवारी (ता. २१) संघाचे अध्यक्ष ॲड. स्वप्नील ढमढेरे यांच्या हस्ते झाले.
श्री कुलस्वामी सहकारी दूध उत्पादक संस्थेत उपमुख्यमंत्री अजित पवार व माजी आमदार अतुल बेनके यांच्या वाढदिवसानिमित्त पाळीव प्राण्यांसाठी मोफत आरोग्य तपासणी शिबिर आयोजित करण्यात आले होते. जुन्नर तालुक्यात १६ ठिकाणी हे शिबिर झाले. दूध उत्पादक शेतकऱ्यांना पशुवैद्यकीय सेवा मिळावी यासाठी मोफत आरोग्य शिबिरांचे आयोजन केले जात आहे. शेतकऱ्यांना संकरित गोऱ्हे सांभाळणे परवडत नाही. यासाठी सरकारने जबाबदारी घेऊन अनुदान द्यायला हवे, असे आवाहन पुणे जिल्हा दूध संघाचे अध्यक्ष ॲड. ढमढेरे यांनी केले.
या प्रसंगी पुणे जिल्हा दूध संघाचे संचालक बाळासाहेब खिलारी, भाऊसाहेब देवाडे, श्री कुलस्वामी दूध संस्थेचे अध्यक्ष सुरेश गगे, उपाध्यक्ष रामदास शिंदे, सचिव नामदेव गगे, आणेच्या सरपंच प्रियांका दाते, नळवणेच्या सरपंच अर्चना उबाळे, उपसरपंच सुवर्णा देशमुख, शिंदेवाडीचे सरपंच अजित शिंदे उपस्थित होते. या वेळी पशुआहार तज्ज्ञ डॉ. बाळासाहेब सोबळे यांनी मार्गदर्शन केले. दूध उत्पादक शेतकऱ्यांना जनावरांसाठी मोफत औषधांचे वाटप केले. कैलास शिंदे यांनी सूत्रसंचालन केले.