जेथे टाळ वाजतात, तेथे चाळ वाजणार का?

बेल्हे, ता. ४ : पेमदरा (ता. जुन्नर) परिसरात ग्रामस्थांचा विरोध असूनही कला केंद्राचे बांधकाम सुरू असल्याने धार्मिक वातावरण असलेल्या या परिसरात, ‘जेथे टाळ वाजतात, तेथे आता चाळ वाजणार का?’ असा सवाल स्थानिक नागरिक उपस्थित करत आहेत.
जुन्नर तालुक्याच्या पूर्व भागातील पेमदरा येथे बाहेरील व्यक्तींनी जमीन खरेदी करून परिसरातील नागरिकांचा विरोध असतानाही कला केंद्राचे बांधकाम सुरू केले आहे. या कलाकेंद्राच्या बांधकामाच्या वरून अतिउच्च वीज वाहिनी (कडूस- बाभळेश्वर) जात आहे. महापारेषण विभागाच्या परवानगीशिवाय याठिकाणी ग्रामस्थांचा विरोध असतानाही बांधकाम सुरू असल्याचे चित्र दिसून येत आहे. महापारेषण विभागाने कलाकेंद्र चालकांना सूचना देऊनही कलाकेंद्राचे काम मात्र जोरात सुरु आहे. पेमदरा येथील कलाकेंद्राला स्थानिकांचा मोठा विरोध असूनही विरोध न जुमानता हे बांधकाम सुरू असल्याने ‘या कलाकेंद्रावर नक्की वरदहस्त कुणाचा?’ असा प्रश्न निर्माण झाला आहे. या कलाकेंद्रामुळे परिसरातील सामाजिक स्वास्थ्य बिघडणार आहे. त्यामुळे या कला केंद्राचे काम तातडीने बंद करावे, अशी आजूबाजूच्या गावांसह परिसरातील नागरिकांची मागणी आहे.
महापारेषण विभागाने या उच्च दाब वीज वाहिनीखाली कोणत्याही बांधकामांना महापारेषणच्या ‘एनओसी’शिवाय परवानगी देवू नये, असे असतानाही महसूल विभागाकडून कला केंद्राच्या बांधकामाला परवानगी कशी मिळाली? असा प्रश्न उपस्थित होत आहे. या कला केंद्राचे बांधकाम तातडीने बंद न केल्यास कल्याण- अहिल्यानानगर महामार्गावर रास्ता रोको आंदोलन करण्याचा इशारा परिसरातील नागरिकांकडून देण्यात आलेला आहे.