पेमदरा ग्रामस्थांचा कला केंद्राला तीव्र विरोध

बेल्हे, ता. १४ : पेमदरा (ता. जुन्नर) येथे बुधवारी (ता. १३) आयोजित विशेष ग्रामसभेत ग्रामस्थांनी कला केंद्राला तीव्र विरोध दर्शवित, कला केंद्र बंद करण्याचा ठराव हात उंचावत सर्वानुमते करण्यात आला. तसेच, यापूर्वी कला केंद्राला ग्रामपंचायतीकडून देण्यात आलेली परवानगी रद्द करण्याचा ठरावही यावेळी सर्वानुमते करण्यात आला. यावेळी मोठ्या संख्येने महिला वर्गासह ग्रामस्थांची उपस्थिती होती.
येथे कला केंद्र सुरू करण्यास परिसरातील ग्रामस्थांचा ठाम विरोध असून, कला केंद्राची परवानगी रद्द करण्यासाठी विशेष ग्रामसभेचे आयोजन केले होते. यावेळी ग्रामसभेच्या अध्यक्षस्थानी सरपंच जयश्री गाडेकर होत्या.
याप्रसंगी उपसरपंच बाळासाहेब दाते, ग्रामसेवक सचिन शिंदे, सुनील महाराज बेलकर, संदीप बेलकर, हनुमंत दाते, संजय दाते आदींसह मोठ्या संख्येने ग्रामस्थ व महिला वर्गाची उपस्थिती होती. तसेच, यावेळी कला केंद्राच्या प्रमुख रेखा मुसळे व त्यांचे सहकारीही उपस्थित होते. पेमदरा गावच्या हद्दीत सुरू असलेले तथाकथित कला केंद्राचे बांधकाम तत्काळ थांबविणेत यावे असे आदेश, नुकतेच जुन्नरचे तहसीलदार डॉ. सुनील शेळके यांनीही संबंधितांना दिले आहेत. जुन्नर तालुक्याच्या पूर्व भागातील पेमदरा येथील गट नंबर ३४० मधील सहा हजार चौरस मीटर क्षेत्रावरील जागेवर कल्चरल हॉल अँड एक्सीबीशन कम कन्वेन्शन सेंटर वापराच्या बांधकाम नकाशांना पुणे येथील नगर रचना मुल्यनिर्धारण विभागाच्या सहाय्यक संचालक यांचेकडील जा.क्र. रेखांकन एनएबीपी/मी.पेमदरा/ता. जुन्नर/ग.नं.३४०/संसपु/१३९७ दि.२४/१२/२०२४ अन्वये परवानगी देण्यात आली आहे. मात्र, या कलाकेंद्रामुळे परिसरातील सामाजिक स्वास्थ्य बिघडणार असल्याने, या कला केंद्राचे काम तातडीने बंद करण्यात यावे, अशी परिसरातील नागरिकांची मागणी आहे. दरम्यान, कला केंद्रासाठी जागा मालकाने जागाच दिली नसती, तर एवढा अट्टाहास करावा लागला नसता, असे मत यावेळी उपसरपंच दाते यांनी व्यक्त केले. आळेफाटा पोलिस ठाण्याच्या वतीने विशेष ग्रामसभेच्या ठिकाणी, चोख पोलिस बंदोबस्त ठेवण्यात आला होता.

पेमदरा येथील कला केंद्र बंद व्हायला पाहिजे, या ग्रामस्थांच्या भूमिकेशी मी सहमत असून, सर्व ग्रामस्थांची जी भूमिका आहे तीच माझीही भूमिका आहे.  
- जयश्री गाडेकर, सरपंच, पेमदरा