लोणीतील शर्यतीत धावले ३९० बैलगाडे

पारगाव, ता. ४ : लोणी (ता. आंबेगाव) येथे महाशिवरात्र यात्रेनिमित्त विविध धार्मिक कार्यक्रमांबरोबरच बैलगाडा शर्यतीचे आयोजन केले होते. यावेळी दोन दिवस चाललेल्या बैलगाडा शर्यतीत एकूण ३९० बैलगाडा मालकांनी सहभाग नोंदवला. विजेत्या बैलगाडा मालकांना एकूण इनाम दोन लाख ७५ हजार १११ रुपये रोख, तसेच चार एलसीडी टीव्ही, दोन भव्य ट्रॉफी, दोन कुलर, दोन टॉवर फॅन, एक मोटार सायकल बक्षीस देण्यात आले.
यावेळी आयोजित शर्यतीत प्रथम क्रमांकात फळीफोडचा मान बंटी ज्ञानेश्वर कामठे (कवठे) व महादू मारुती भोर (खडकी) यांचा बैलगाड्यांनी मिळवला. द्वितीय क्रमांकात श्रेयशकुमार रंगनाथ करंजखेले (धामणी) व माउली पांडे (मुखई), तृतीय क्रमांकात लहू लक्ष्मण पोळ (कवठे) व सर्जेराव नामदेव दळवी (कान्हूर मेसाई), चतुर्थ क्रमांकात दत्ता सुदाम रणपिसे (चिंचगाईवाडी) व श्रेयश दत्तात्रेय चवरे (धामणी) यांच्या गाड्यांनी फळीफोडचा मान मिळवला. घाटाचा महाराज किताब किरण हनुमंत जाधव व कैलास गावडे यांच्या गाड्याने मिळवला.
शर्यतीला महसूल मंत्रालयाचे सचिव डॉ. कैलास गायकवाड, सरपंच सावळेराम नाईक, माजी विद्यार्थी विकास प्रबोधनीचे अध्यक्ष उदय वाळुंज, चेतन लोखंडे, बाळासाहेब ज्ञानोबा गायकवाड, पांडुरंग गायकवाड यांनी भेट दिली. शर्यतीची व्यवस्था अशोक आदक पाटील, पिंटू पडवळ, बाळासाहेब गायकवाड, संदीप आढाव, नामदेव वाळुंज, सतीश थोरात, सोनबा वाळुंज, विकास पंचरास , समीर शिनलकर यांनी पाहिली.