जारकरवाडी यात्रेत रंगल्या लक्षवेधी चीतपट कुस्त्या

पारगाव, ता. १० : जारकरवाडी (ता. आंबेगाव) येथील ग्रामदैवत श्री वडजादेवी यात्रा उत्साहात पार पडली. यात्रेच्या दुसऱ्या दिवशीही परिसरातील भाविकांनी दर्शनासाठी गर्दी केली होती. कुस्त्यांच्या आखाड्यात जिल्ह्याभरातून आलेल्या मल्लांच्या लढती लक्षवेधी ठरल्या. विजेत्या पहिलवानांना एकूण ५० हजार रुपयांच्या रोख बक्षीसे देण्यात आली.
जारकरवाडी येथील श्री वडजादेवी यात्रेला शनिवारपासून (ता. ८) उत्साहात सुरुवात झाली. दुसऱ्या दिवशी दुपारी कुस्त्यांच्या आखाड्यात जिल्हाभरातील मल्लांनी चमकदार खेळी करून चितपट कुस्त्या केल्या. निकाली कुस्ती करणाऱ्या पहिलवानास ५१ रुपयांपासून २१०० रुपयांपर्यंत बक्षीसे देण्यात आली. सुमारे ५० हजार रुपयांची रोख बक्षीसे देण्यात आली. आखाड्याची व्यवस्था सचिन लबडे, एकनाथ भांड, शरद भोजने, भरत लबडे, पोपट लोले, सुरेश मंचरे, सुभाष लबडे, खंडू भोजने आदींनी पाहिली. पंच म्हणून पहिलवान नंदू ढोबळे, राजू पाबळे, धोंडिभाऊ पाबळे यांनी काम पाहिले.