अवसरीतील विहिरीत पडून बिबट्याच्या बछड्याचा मृत्यू

पारगाव, ता. १४ : अवसरी बुद्रुक (ता. आंबेगाव) येथे विहिरीत पडून बिबट्याच्या बछड्याचा मृत्यू झाला, अशी माहिती मंचर वनपरिक्षेत्र अधिकारी विकास भोसले यांनी दिली.
अवसरी बुद्रुक येथील अवठडा परिसरातील सुलोचना देवराम हिंगे यांच्या मालकीच्या शेतामध्ये सिद्धेश मंगेश हिंगे हा शेतामध्ये ट्रॅक्टरने शेत फणनी करण्यासाठी गेला असता विहिरीत डोकावून पाहिले असता त्याला विहिरीत बिबट्याचा बछडा आढळून आला. त्याने तत्काळ ही माहिती वनरक्षक सी. एस. शिवचरण यांना दिली. हे माहिती मिळताच शिवचरण यांनी बिबट शीघ्र कृती दलाचे मनोज तळेकर, धर्मेंद्र ढगे, चारुदत्त बांबळे, मिलिंद टेमकर, कुणाल गावडे, देवेद्य वाघ, हर्षल गावडे, हर्षल चौधरी, प्रज्वल आवारी व वन कर्मचारी अरुण खंडागळे यांना घेऊन बछड्याला बाहेर काढले. बिबट्याचा बछडा हा अंदाजे पाच ते सहा महिन्यांचा असून, ती मादी होती, असे वनपाल प्रदीप कासारे यांनी सांगितले. पशुवैद्यकीय अधिकारी डॉ. विजय कोंढवळे यांनी या बछड्याचे शवविच्छेदन करून अवसरी बुद्रुक व गावडेवाडीच्या सीमेवर असणाऱ्या बिबट शीघ्र कृती दल परिसरात त्याच्यावर वनपाल प्रदीप कासारे यांच्या सूचनेनुसार अंत्यसंस्कार केले.