पारगावात मिरवणूक, धार्मिक प्रवचन

पारगाव, ता. ११ : पारगाव (ता. आंबेगाव) येथे भगवान महावीर स्वामी यांची प्रतिमा मिरवणूक, धर्मिक प्रवचन आदी कार्यक्रमाद्वारे जैन बांधवांच्या वतीने मोठ्या उत्साहात महावीर जयंती साजरी करण्यात आली.
महावीर जयंतीनिमित्त गुरुवारी सकाळी येथील बाजारपेठेतून भगवान महावीर यांच्या प्रतिमेची मोठ्या उत्साहात मिरवणूक काढण्यात आली होती. मिरवणुकीत मांजरवाडी, रांजणी, वळती, पिंपरखेड, जांबुत, काठापूर बुद्रुक, निरगुडसर, पारगाव, सविंदणे, लाखणगाव, शिंगवे, नागापूर, खोडद, निघोज या १४ गावांतील जैन बांधव सहभागी झाले होते. ग्रामस्थ व व्यापारी बांधवांच्या वतीने ठिकठिकाणी भगवान महावीर यांच्या प्रतिमेला पुष्पहार अर्पण करून प्रतिमेचे पूजन करण्यात आले. मिरवणुकीची सांगता येथील तनिष्का मंगल कार्यालयात झाली. मधुर व्याख्यानी प.पु. डॉ. प्रतिभाश्रीजी महाराज साहेब (म.सा.) व मधुरभाषी डॉ. प्रशंसाजी महाराज साहेब (म.सा.) यांचे धार्मिक प्रवचन झाले.
कार्यक्रमाचे नियोजन आंबेगाव तालुका जैन महासंघ अंतर्गत श्री. सकल जैन समाज पारगाव, काठापूर, नागापूर यांनी केले.