बिबट्याच्या हल्ल्यात धामणीत कालवड ठार

पारगाव, ता. १८: धामणी (ता. आंबेगाव) येथे बिबट्याच्या हल्ल्यात एक शेळी व अवसरी बुद्रुक येथे एक कालवड ठार झाली आहे.
धामणी येथील खंडोबा मंदिर परिसरातील पांगुळठिका या भागात बुधवारी (ता. १६) भर दुपारी बिबट्याने शिवाजी गाढवे यांच्या शेळीवर हल्ला करून शेळीचा फडशा पडला.
घटनेची माहिती मिळताच धामणी वन परिमंडळ विभागाच्याच्या वनपाल नीलम चव्हाण, वनरक्षक अस्मिता शिंदे, दिलीप वाघ, उपसरपंच अक्षय विधाटे, गणेश जाधव, गोविंद वाघ यांनी घटना स्थळी भेट देऊन पाहणी केली आहे. गाढवे यांचे जवळपास १२ हजार रुपयांचे नुकसान झाले.
धामणी परिसरात तीन दिवसांपूर्वी हिवरकर मळा येथे शेतकऱ्यांना बिबट्याचे दर्शन झाले असल्याचे गोरक्ष हिवरकर यांनी सांगितले. अवसरी बुद्रुक येथील अवठडा (हिंगे) वस्ती येथे बुधवारी (ता. १६) पहाटे मनीषा भरत हिंगे यांच्या घराच्या शेजारी गोठ्यात बांधलेल्या कालवडीवर बिबट्याने हल्ला करून कालवडीला शेजारच्या उसाच्या शेतात ओढत नेऊन फस्त केले आहे. वनरक्षक सी. एस. शिवशरण यांनी घटनास्थळी जाऊन पाहणी केली आहे.