अवसरीत खड्डे चुकविताना अपघात

पारगाव, ता. २४ : अवसरी बुद्रुक (ता. आंबेगाव) गावाच्या हद्दीत मंचर-पारगाव रस्त्यावर मुक्ताबाई मंदिराजवळ खड्डे चुकविण्याच्या नादात दुचाकी व मोटारीची समोरासमोर टक्कर झाली. यामुळे झालेल्या अपघातात दुचाकीस्वार सचिन ज्ञानेश्वर पडवळ (वय २९, रा.सविंदणे ता. शिरूर) हे गंभीर जखमी झाले. त्यांच्यावर पारगाव येथील खासगी रुग्णालयात उपचार सुरू आहेत.
याबाबत अधिक माहिती अशी की, सविंदणे येथील सचिन ज्ञानेश्वर पडवळ हे त्यांची दुचाकीवरून (एम. एच. १२, एल. ई. ४५९८) सोमवारी (ता. २१) सकाळी मंचरच्या दिशेकडे जात होते. त्याचवेळी मंचर येथील नवीन लालखान पठाण हे मोटारीतून (एम. एच. ४३ आर ४२६९) कुटुंबासह पारगाव बाजूकडे जात होते. अवसरी बुद्रुक गावचे हद्दीत मुक्ताबाई मंदिराजवळ मोटार व दुचाकीची समोरासमोर धडक झाली. अपघातात दुचाकीस्वार सचिन ज्ञानेश्वर पडवळ हे गंभीर जखमी झाला आहे. अपघातात दोन्ही वाहनांचे मोठे नुकसान झाले आहे. अवसरी ते पारगाव या रस्त्यावर ठिकठिकाणी मोठ्या प्रमाणात खड्डे असून खड्ड्यांमुळे वारंवार छोटे - मोठे अपघात घडत आहेत. या रस्त्याचे सिमेंट काँक्रिटीकरण करण्यासाठी ४१८ कोटी रुपये मंजूर झाले आहेत. मात्र अद्यापही काम सुरू झाले नाही. दरम्यान, ठेकेदाराने तात्पुरत्या स्वरूपात तत्काळ खड्डे बूजवावेत, अशी मागणी स्थानिक नागरिक, प्रवासी करत आहेत.

05880