बिबट्यासह चोरांचासही वडगावपीर परिसरात धोका

पारगाव, ता. ३० : वडगावपीर (ता.आंबेगाव) येथील राजगुडे वस्ती- चोरओढा येथे राहाणारे नामदेव तुकाराम आदक यांच्या गोठ्यातील शनिवारी(ता. २६) रात्री एक वाजण्याच्या सुपारास चार बोकड व दोन पाठी (छोट्या शेळ्या) चोरीला गेल्या आहेत. अंदाजे पन्नास हजार रुपयांचे नुकसान झाल्याची माहिती नामदेव आदक यांनी दिली. यामुळे सध्या बिबट्यासह चोरांचीही धोका निर्माण झाला आहे.
याप्रकरणी आदक यांनी अज्ञात चोरट्याविरुद्ध पारगाव कारखाना पोलिस ठाणे येथे तत्कार दाखल दिली आहे. यापूर्वी लोणी येथील शेतकरी सावळेराम सिनलकर यांच्या गोठ्यातून तीन बोकड व चार शेळ्या चोरीला गेल्या होत्या व जारकरवाडी हद्दीतील वैदवाडी येथील शेतकरी सागर कजबे यांच्याही घराजवळून सात शेळ्या चोरी गेल्याची प्राथमिक माहिती आहे. एका बाजूला बिबट्याच्या भीती तर दुसरीकडे चोरांची भीती चोरट्यांचा पोलिस प्रशासनाने व बिबट्याचा वनविभागाने बंदोबस्त करावा, अशी मागणी स्थानिक ग्रामस्थांनी केली आहे.