बिबट्याच्या हल्ल्यात शेतकरी जखमी

पारगाव, ता. १२ : लोणी (ता. आंबेगाव) येथे बिबट्याच्या हल्ल्यात बाळासाहेब वाल्हू वाळूंज हे जखमी झाले आहेत. त्यांना वनविभागाने मंचर येथील उपजिल्हा रुग्णालयात दाखल केले असून, त्यांची प्रकृती स्थिर असल्याची माहिती मंचर वनपरिक्षेत्र अधिकारी विकास भोसले यांनी दिली.
लोणी धामणी हा परिसर दुष्काळग्रस्त समजला जातो. मात्र या परिसरात वारंवार बिबट्याचे हल्ले होत आहेत. एप्रिल, मे व जून या तीन महिन्यात लोणी जवळच असणाऱ्या खडकवाडी वाळुंजनगर परिसरात बिबट्याने सात वेगवेगळ्या घटनांमध्ये सात जणांवर हल्ले करून नागरिकांना जखमी केले होते. याशिवाय याच परिसरात एकाच वेळी एकाच पिंजऱ्यात एकत्र दोन बिबटे अडकल्याची घटनादेखील घडली होती.
या लोणी परिसरात असणाऱ्या बाग वस्ती येथे बाळासाहेब वाल्हू वाळूंज हे आपल्या कुटुंबासह वास्तव्यास आहे. मंगळवारी (ता. १२) पहाटे चारच्या सुमारास त्यांना आपल्या जाळीत बांधलेल्या कुत्र्याचा आवाज आला. त्यामुळे ते उठून घराच्या बाहेर पाहिले असता एक बिबट्या त्यांच्या कुत्र्याचा पाय ओढत होता व समोर दोन बिबटे उभे होते. त्यांनी तत्काळ जवळच पडलेले लाकूड हातात घेऊन कुत्र्याचा बचाव करण्यासाठी बिबट्यावर लाकूड उगारले असता त्यातील एका बिबट्याने त्यांच्यावर झडप घातली. त्यात त्यांना चार- पाच ठिकाणी जखमा झाल्या आहेत. नंतर त्यांनी आरडा ओरड केल्यानंतर आजूबाजूच्या घरातील लाइट चालू झाल्यावर नागरिक बाहेर येऊ लागल्यामुळे मादी व दोन बछडे पळून गेले आहेत. या परिसरात एक मादी व दोन बछडे फिरत होते.
या घटनेची माहिती मिळताच वनरक्षक योगेश निघोट, अवसरी- गावडेवाडी बिबट कृती दलाचे सदस्य धर्मेंद्र ढगे, चारुदत्त वांबळे व हर्षल चौधरी यांनी घटनास्थळी जाऊन वाळुंज यांना मंचर येथील उपजिल्हा रुग्णालयात दाखल केले आहे त्यांच्यावर उपजिल्हा रुग्णालयात उपचार चालू आहेत. त्यांची प्रकृती स्थिर असल्याचे वनविभागाने सांगितले आहे.