पोंदेवाडीत तीन मोरांच्या मृत्यूने खळबळ

पारगाव, ता. १८: पोंदेवाडी (ता. आंबेगाव) येथे तीन दिवसांत तीन मोरांचा मृत्यू झाल्याने नागरिक हळहळ व्यक्त करीत आहेत. वनविभागाने राष्ट्रीय पक्षी मोरांच्या मृत्यूचे कारण शोधून, त्यावर तातडीने उपाययोजना करावी, अशी मागणी पर्यावरणप्रेमींकडून होत आहे.

आंबेगाव तालुक्याच्या पूर्व भागातील पोंदेवाडी, काठापूर बुद्रुक जारकरवाडी, धामणी या परिसरात मोठ्या प्रमाणावर मोरांचे वास्तव्य आहे. दोन दिवसात तीन मोर मृत अवस्थेत आढळून आले. त्यांचे मृत्यू का झाले याचे योग्य कारण शोधून यावर वनविभागाने योग्य ती उपाययोजना केली पाहिजे, अशी मागणी पर्यावरणप्रेमींसह आंबेगाव तालुका खरेदी विक्री संघाचे माजी अध्यक्ष अनिल वाळुंज यांनी केली आहे.
अन्नाच्या शोधात मोर डोंगर परिसरातून शेतात येतात. अनेक वेळा शेतकरी पिकांना वेगवेगळ्या स्वरूपाच्या फवारण्या करतात. त्यामुळे विषबाधा होण्याची शक्यता असते. तसेच पोंदेवाडी परिसरात मोठ्या प्रमाणावर मोरांचे वास्तव्य आहे. येथे मोर पाहण्यासाठी येणाऱ्या पर्यटकांची संख्या वाढू लागली आहे. मात्र, मोरांचा मृत्यूमुळे चिंतेचे निर्माण झाले आहे.
पोखरकरवस्ती येथे शनिवारी (ता.१६) येथील राहुल पोखरकर यांना रस्त्याच्या कडेला एक मोर मृतावस्थेत आढळला. त्यांनी याबाबत अनिल वाळुंज यांना कळविले. वाळुंज यांनी वनविभागाच्या कर्मचाऱ्यांना घटनेची माहिती दिली. वनविभागाच्या कर्मचाऱ्यांनी मोराच्या मृत्यूची माहिती वरिष्ठ कार्यालयाला न कळविता किंवा मृत मोराचे शवविच्छेदन न करता त्याच्या मृत्यूचे कारण शोधण्याची तसदी न घेता परस्पर विल्हेवाट लावल्याची स्थानिक नागरिकांच्या मध्ये चर्चा आहे.
यासंदर्भात माहिती घेण्यासाठी रविवारी (ता.१७) सकाळी मंचर वनपरिक्षेत्र अधिकारी विकास भोसले यांच्याशी संपर्क केला असता त्यांनी सांगितले. मोराच्या मृत्यू संदर्भात काहीच माहिती नसून चौकशी करून माहिती सांगतो, असे सांगितले.
दरम्यान, पोखरकरवस्ती येथे सोमवारी (ता.१८) दुपारी पुन्हा दोन मोर मृतावस्थेत आढळल्याने परिसरात खळबळ उडाली. या घटनेमुळे वनविभाग खडबडून जागे झाले मंचर वनपरिक्षेत्र अधिकारी विकास भोसले, वनपाल नीलम चव्हाण, वनरक्षक पूजा कांबळे, माजी उपसरपंच संदीप पोखरकर यांनी तातडीने घटनास्थळी पोचले. पशुधन विकास अधिकारी डॉ.नागेश पुरी यांनी मृत मोरांचे शवविछेदन केले असता कावीळ सदृश लक्षणे आढळून आली. मोरांच्या यकृतावर परिणाम झाल्याने मोरांचा मृत्यू झाला असल्याचे डॉ. नागेश पुरी यांनी सांगितले.