पारगावमध्ये बिबट्या जेरबंद

पारगाव, ता. १८ : पारगाव (ता. आंबेगाव) येथील ढोबळे मळ्यात वनविभागाने लावलेल्या पिंजऱ्यात शनिवारी (ता. १८) पहाटे साडेपाच वाजण्याचा सुमारास बिबट्या जेरबंद झाला.
ढोबळेमळा परिसरात मागील दोन आठवड्यांपासून बिबट्याचे वारंवार दर्शन होत होते. त्यामुळे परिसरातील नागरिकांमध्ये भीती निर्माण झाली होती. त्यामुळे माजी उपसरपंच विठ्ठल ढोबळे यांनी या भागात पिंजरा लावावा, अशी मागणी वनपाल निलम चव्हाण यांच्याकडे केली होती. तसेच, ग्रामस्थांच्या मागणीवरून ढोबळेमळ्यात जवळे रस्ता या ठिकाणी अनिल शेवाळे यांच्या घराच्या बाजूला दोन दिवसांपूर्वी पिंजरा लावलेला होता. त्यात शनिवारी पहाटे साडेपाच वाजण्याच्या सुमारास बिबट्या जेरबंद झाला. हा बिबट्या नर जातीचा असून, अंदाजे ५ ते ६ वर्षाचा असेल, असे वनविभागाने सांगितले. या बिबट्याला माणिकडोह बिबट निवारा केंद्र या ठिकाणी घेऊन जाणार असल्याचे वनरक्षक पूजा कांबळे यांनी सांगितले.