पोंदेवाडीतून चोरट्याने लांबविल्या दोन शेळ्या

पारगाव, ता. २२ : पोंदेवाडी (ता. आंबेगाव) येथे भरदुपारी गोठ्याच्या दरवाजाचे कुलूप तोडून चोरट्याने दोन शेळ्या चोरून नेल्या आहे. येथील खारावस्तीजवळ जनाबाई मोहन गोसावी या ज्येष्ठ महिला राहतात. शेळीपालन करून कुटुंबाचा उदरनिर्वाह चालवतात. बिबट्याच्या भीतीमुळे शेळ्यांना बंदिस्त गोठा बनवला आहे. पारगाव येथे जनाबाई गोसावी शुक्रवारी (ता.२१) दुपारी गेल्या होत्या. त्या दुपारी तीन वाजण्याच्या सुमारास घरी आल्या असता गोठ्याच्या दरवाजाचे कुलूप तोडलेले दिसले. त्यांनी आत जाऊन शेळ्या मोजल्या असता दोन शेळ्या कमी भरल्या. चोरट्याने दोन शेळ्या चोरून नेल्याने जनाबाई गोसावी यांचे सुमारे २० हजार रुपयांचे नुकसान झाले आहे.