एकादशीमुळे मांसाहारी कोमात, शाकाहारी हॉटेल जोमात

पारगाव, ता. ३० : नवीन वर्षाच्या पूर्वसंध्येला आयोजित करण्यात येणाऱ्या थर्टीफस्ट पार्ट्यांमध्ये उद्याच्या पुत्रदा एकादशीमुळे मांसाहारी खवय्यांच्या जिभेला लगाम घालावा लागणार आहे. अनेक मांसाहारी खवय्ये शाकाहाराकडे वळणार असल्याने शाकाहारी हॉटेल व्यावसायिकांनी उद्याच्या थर्टीफस्ट पार्ट्यांसाठी जय्यत तयारी केली.
नवीन वर्षाच्या पूर्वसंध्येला मोठ्या प्रमाणावर थर्टीफस्ट पार्ट्यांचे आयोजन केले जाते. विशेष करून मांसाहारी पार्ट्यांचे मोठ्या प्रमाणावर आयोजन केले जाते. ३१ डिसेंबरला मांसाहारी हॉटेल रात्री उशिरापर्यंत गर्दीने तुडूंब भरलेली असतात. या दिवशी मोठ्या प्रमाणावर चिकन, मटण तसेच माश्यांना मोठ्या प्रमाणात मागणी असते. मांसाहारी हॉटेल क्षेत्रात मोठ्या प्रमाणावर आर्थिक उलाढाल होत असते. यावर्षी नवीन वर्षाच्या पूर्वसंध्येला उद्या बुधवारी पुत्रदा एकादशी आहे. त्यामुळे मांसाहारी खवय्यांच्या उत्साहावर विरजण आले आहे. त्यामुळे मांसाहारी हॉटेल व्यवसायाच्या धंद्यावर परिणाम होऊन दरवर्षीपेक्षा यावर्षी उत्पन्नात मोठ्या प्रमाणात घट होणार असल्याचे अवसरी बुद्रुक येथील हॉटेल व्यावसायिक दिनेश चव्हाण, लोणी येथील प्रशांत डोके व काठापूर बुद्रुक येथील अतुल पवळे यांनी सांगितले
एकादशीमुळे मांसाहारी खवय्ये शाकाहारी कडे वळणार असल्याने शाकाहारी हॉटेल व्यावसायिकांनी उद्याच्या थर्टीफस्ट पार्ट्यांसाठी जय्यत तयारी केली असून, खवय्यांना आकर्षित करण्यासाठी विविध प्रकारचे शाकाहारी पदार्थ उपलब्ध करण्याचे नियोजन केले असल्याचे पोंदेवाडी येथील हॉटेल व्यावसायिक अक्षय थोरात यांनी सांगितले.

पोलिसांचे आवाहन
पारगाव कारखाना पोलीस ठाण्याच्या वतीने आंबेगाव तालुक्याच्या पूर्वभागात थर्टीफस्टला कायदा सुव्यवस्था राखण्यासाठी प्रमुख रस्ते, तसेच चौक या ठिकाणी नाकाबंदी करण्यात येणार आहे. तसेच, हद्दीतील हॉटेल तसेच बिअरबार व्यवसायिकांना नियमांचे पालन करण्याच्या सूचना दिल्या असून, मद्यप्राशन करून कोणी गोधळ घालत असेल तर तत्काळ पोलिसांशी संपर्क साधण्याचे आवाहन सहाय्यक पोलीस निरीक्षक नेताजी गंधारे यांनी केले.