जुन्नरमध्ये शेतकऱ्यांचा आनंद द्विगुणित

आपटाळे, ता. ३ : जुन्नर तालुक्याच्या पश्चिम आदिवासी भागातील सुराळे, बेलसर, निरगुडे, काले, येणेरे, इंगळून, घाटघर, अंजनावळे, खामगाव, माणिकडोह, कुसूर, पिंपळगाव सिद्धनाथ आदी भागात बैलपोळा सण धामधुमीत साजरा करण्यात आला.
बैलपोळा हा सण शेतकऱ्यांचा उत्साह द्विगुणित करणारा सण असल्याने या भागातील शेतकऱ्यांनी सकाळपासूनच जुन्नर येथील मुख्य बाजारपेठेत बैलपोळ्याचे साहित्य खरेदी करण्यासाठी गर्दी केली होती. तर घरात बैलांच्या प्रतीकात्मक पूजेसाठी देखील बाजारात बैलांची खरेदी करण्यासाठी गर्दी दिसून आली. निरगुडे, काले , येणेरे येथे पारंपरिक पद्धतीने बैलपोळा साजरा करण्यात आला. येथील मारुती मंदिराच्या लहान व अरुंद गाभाऱ्यातून बैलांना देवाच्या दर्शनासाठी घेऊन जाण्याची पारंपारिक प्रथा असून नागरिकांनी बैल पोळ्याची मिरवणूक पाहण्यासाठी प्रचंड गर्दी केली अशी माहिती ग्रामस्थ विश्वास रोकडे यांनी दिली. सायंकाळी ७ च्या सुमारास गावातून ढोल ताशांच्या गजरात बैलांची मिरवणूक काढण्यात आली.

02209