आंबा उत्पादकांचे मोडले कंबरडे

आपटाळे, ता. २६ : येणेरे, वडज, पारुंडे, शिंदे, राळेगण, बोतार्डे, बेलसर या भागाला आंब्याचे आगर म्हणून ओळखले जाते. या भागातील आंबा मुंबई येथे प्रामुख्याने विक्रीसाठी पाठवला जातो. दररोज या भागातून जवळपास १५ हजार बॉक्सची आवक कृषी उत्पन्न बाजार समिती नवी मुंबई येथे होते. सध्या सुरू असलेल्या बेमोसमी पावसामुळे मात्र आंबा उत्पादकांचे कंबरडे मोडले आहे.
दरवर्षी मे महिन्यात या भागातील आंबा काढणीस सुरुवात होते. मुंबई येथे बाजार समितीमध्ये आंब्याला चांगले बाजारभाव देखील मिळतात. यंदाच्या वर्षी या भागात निसर्गाच्या असमतोलामुळे आंब्याच्या उत्पादनात मोठ्या प्रमाणात घट झाली होती. त्यामुळे आंबा उत्पादकांच्या अपेक्षा उरल्यासुरल्या मालावर अवलंबून होत्या. मात्र यंदाच्या वर्षी मे महिन्यातच पावसाने हजेरी लावली. सोसाट्याचा वादळी वारा, मुसळधार पाऊस यामुळे आंब्याचे मोठ्या प्रमाणावर नुकसान झाले. आंब्याच्या एका बॉक्स मागे जवळपास ५०० रुपयांचे शेतकऱ्यांचे नुकसान होत आहे. तर अंदाजे या भागातील आंबा उत्पादकांचे सरासरी ७५ लाखाहून अधिक रुपयांचे दररोज नुकसान होत असल्याचे नवी मुंबई कृषी उत्पन्न बाजार समितीतील आंबा व्यापारी संजय पानसरे यांनी सांगितले.