जुन्नर तालुक्यातील भात पिकाला दिलासा

आपटाळे, ता. १९ : गेले काही दिवस दडी मारलेल्या पावसाने जुन्नर तालुक्याच्या पश्चिम आदिवासी भागात मंगळवारी (ता. १९) पुन्हा हजेरी लावली. सकाळी ११ वाजल्याच्या सुमारास जोरदार पावसाला सुरुवात झाली. आदिवासी भागात, तसेच वडज व माणिकडोह धरणाच्या पाणलोट क्षेत्रात सर्वदूर पाऊस झाल्याने धरणाच्या पाणीपातळीत चांगली वाढ होण्यास मदत होईल. पावसामुळे भात पिकाला दिलासा मिळाला आहे.
मीना नदीच्या खोऱ्यात झालेल्या पावसाने वडज धरणातील साठ्यात समाधानकारक वाढ झाली आहे. आजमितीस धरणात ८६.२१ टक्के इतका पाणीसाठा झाला आहे .दुपारी ३.३० वाजता वडज धरणातून मीना पूरक कालव्यात १५० क्यूसेकने विसर्ग सुरु केला आहे. माणिकडोह धरणात आज ३२ मिलिमीटर पाऊस झाला असून, आजमितीस धरणात ४४.३१ टक्के इतका पाणीसाठा झाला आहे. माणिकडोह धरणातील पाणीसाठा वाढण्यासाठी पाणलोट क्षेत्रात मोठ्या प्रमाणात पाऊस होण्याची आवश्यकता आहे.