जुन्नरमध्ये आदिवासी महिलेला मान

आपटाळे, ता. ९ : जुन्नर तालुका पंचायत समितीच्या सभापतिपदासाठी अनुसूचित जमाती महिला आरक्षण जाहीर झाले. त्यामुळे तालुक्यातील आदिवासी समाजाच्या महिलेला पंचायत समितीच्या इतिहासात पहिल्यांदाच प्रतिनिधित्व करण्याची संधी मिळणार आहे.
जुन्नर तालुका पंचायत समितीच्या यापूर्वी काळात आदिवासी समाजाचे सुरेश तुळशीराम शेळकंदे व यशवंत राजू सुपे केवळ या दोघांना सभापतिपदी संधी मिळाली होती. पंचायत समितीचे सभापतिपद अनुसूचित जमाती महिलेसाठी आरक्षित झाल्याने आदिवासी समाजातील नेते मंडळी आपल्या घरातील महिला उमेदवार या निवडणुकीत उभा करण्यासाठी मोर्चेबांधणीची लगबग पुढील काळात पाहावयास मिळणार आहे. दरम्यान आदिवासी समाजाला प्रतिनिधित्व मिळाल्याने आदिवासी समाजामध्ये आनंदाचे वातावरण निर्माण झाले आहे.
जुन्नर तालुक्यात १८४ महसूली गावांचा समावेश असून जवळपास ६५ हून अधिक गावे ही आदिवासी भागामध्ये समाविष्ट होतात. पर्यायाने आदिवासी समाजाची लोकसंख्या देखील तालुक्यात मोठ्या संख्येने आहे. तालुक्यात आदिवासी भागामध्ये उदापूर, डिंगोरे, बारव, तांबे या पंचायत समिती गणांमध्ये आदिवासी समाज मोठ्या संख्येने वास्तव्यास आहे. या गणांमधील बहुसंख्य गावे ही पेसा कायद्याच्या कक्षेत येतात.