जुन्नर बसस्थानकात प्रवाशांची गर्दी

आपटाळे, ता २१ : दिवाळीच्या सुट्ट्यांमुळे जुन्नर बसस्थानकात मंगळवारी (ता २१) प्रवाशांची गर्दी पाहावयास मिळत आहे. लक्ष्मीपूजन असल्याने आदिवासी भागातून मोठ्या संख्येने नागरिकांनी खरेदीसाठी जुन्नर शहरात गर्दी केली होती. सणामुळे जुन्नर शहरातील बाजारपेठेत ग्राहकांची खरेदीसाठी झुंबड उडाल्याचे चित्र होते.
जुन्नर तालुक्याच्या पश्चिम आदिवासी भागातील मीना व कुकडी नदीच्या खोऱ्यातील चाळीसहून अधिक गावांतील नागरिकांसाठी जुन्नर शहर ही मुख्य बाजारपेठ आहे. गेल्या दोन दिवसांपासून जुन्नरकडे येणाऱ्या नागरिकांची संख्या वाढल्याने एसटी बस प्रवाशांनी भरून वाहत आहेत. त्यामुळे बसस्थानक परिसरात सकाळी दहा वाजल्यापासूनच प्रवाशांची मोठी गर्दी पाहावयास मिळत आहे. पुढील दोन दिवसांनी भाऊबीज असल्याने प्रवाशांच्या संख्येत अधिक वाढ होण्याची शक्यता आहे. एसटी महामंडळाने प्रवाशांसाठी दर्जेदार सुविधा निर्माण कराव्यात, अशी मागणी प्रवाशांकडून केली जात आहे.
02807