महसूल कर्मचाऱ्यांचे जुन्नरमध्ये आंदोलन

जुन्नर, ता. १६ : मावळ तालुक्यातील तहसीलदारांसह अन्य महसूली कर्मचाऱ्यांवर शासनाने केलेल्या निलंबनाच्या कारवाईच्या विरोधात जुन्नर तालुक्यातील महसूल कर्मचाऱ्यांनी कामबंद आंदोलन छेडत सामूहिक रजेवर जाण्याचा निर्णय घेतला आहे. सोमवारपासून (ता. १५) जुन्नर तालुक्याचे तहसीलदार, नायब तहसीलदार, महसूल मंडलाधिकारी, महसूल कर्मचारी, ग्राम महसूल अधिकारी व कोतवाल सर्वांनीच कामबंद आंदोलन पुकारत तहसील कार्यालयाच्या आवारात आंदोलनास बसले आहेत. याबाबत जिल्हाधिकाऱ्यांना जुन्नर तालुका ग्राम महसूल अधिकारी व मंडळ अधिकारी संघटना व जुन्नर तालुका महसूल कर्मचारी संघटना यांच्या वतीने निवेदन देण्यात आले आहे.
जोपर्यंत या अधिकारी व कर्मचाऱ्यांचे निलंबन मागे घेतले जात नाही, तोपर्यंत सामूहिक रजेवर जाण्याचा इशारा जुन्नर तालुक्यातील महसूल कर्मचाऱ्यांनी दिला आहे. तालुक्यातील ग्राम महसूल अधिकारी व मंडल अधिकाऱ्यांनी तहसीलदार कार्यालयात एकत्र येऊन डीएससी, पेनड्राइव्ह जमा केल्या. मात्र, महसूल कर्मचाऱ्यांच्या आंदोलनाचा फटका तालुक्यातील नागरिकांना बसला आहे. तहसील व तलाठी कार्यालये बंद असल्याने नागरिकांची कामे मार्गी न लागल्याने नागरिकांमधून नाराजी व्यक्त करण्यात येत आहे.