बावडा येथे टोल वसुलीवरून वाद

बावडा, ता. १० ः संत तुकाराम महाराज पालखी महामार्गाच्या इंदापूर- अकलूज महामार्गावर असलेल्या सराटी- बावडा या गावाजवळील अचानक सुरू झालेल्या टोलनाक्यामुळे वाहन चालक व स्थानिक नागरिकांमध्ये टोल वसुलीवरून वाद होऊ लागल्याचे असल्याचे चित्र मिळत आहे.
इंदापूर ते सराटी पर्यंत सुरू असलेल्या पालखी महामार्गाच्या बऱ्याच गावातील पुलाचे व सेवा रस्त्यांचे काम चालू असतानाही वसुली केली जात असल्याने वाहचालक व स्थानिक नागरिकांमधून नाराजी व्यक्त होत आहे. वकीलवस्ती व बावडा या ठिकाणी सेवा रस्त्याच्या पुलाचे व सेवा रस्त्याचे काम चालू आहे. तरी देखील हा टोलनाका अचानक सुरू झाल्याने झाल्याने टोल घेण्यावरून व देण्यावरून वाद होऊ लागले आहेत. संबंधित टोलनाक्यावर विचारणा केली असता कुणीही माहिती देऊ शकले नाही, तसेच रस्ता व टोल हे दोन्ही वेगवेगळे काम आहे, असे उत्तरे दिले जात आहे.

अगोदर काम करा, नंतर टोल घ्या
येणाऱ्या काही महिन्यात या पालखी महामार्गावरून संत तुकाराम महाराजांच्या पालखी सोहळा जाणार आहे. त्यामुळे पहिल्यांदा या रस्त्याचे काम झाले पाहिजे व नंतरच टोलनाक्याची वसुली झाली पाहिजे, अशी नागरिक व वाहनचालकांमधून मागणी होत आहे. या महामार्गाच्या रस्त्यावर कुठलीही सुविधा नसतानाही टोलनाका सुरू झाल्याने आश्चर्य व्यक्त होत आहे. इंदापूर ते सराटीपर्यंत जाणाऱ्या पालखी महामार्गाच्या रस्त्याचे व पुलाचे काम पूर्ण होणे महत्त्वाचे आहे, मात्र असे न होता व माहिती न देता अचानकच टोल नाका सुरू झाल्याने प्रवासी वाहनचालक व स्थानिक नागरिकांमधून नाराजी व्यक्त होत आहे.

ग्रामपंचायतीचा परवानगी न घेता बांधला टोलनाका
बावडा हद्दीत असलेला टोलनाका बांधताना प्रशासनाने ग्रामपंचायत बावडा यांची परवानगी घेतली नसल्याचे उघड झाले आहे. ग्रामपंचायत बावडा यांनी टोलनाका कसा चालू केला व बांधकामाची परवानगी का घेतली नाही? अशी लेखी पत्र काढले आहे. या टोलनाक्यावर स्थानिक लोकांना पूर्णपणे टोल माफी द्यावी, स्थानिक युवकांना कामावर घ्यावे, असे निवेदनात म्हटले आहे. अपूर्ण असलेल्या रस्त्याच्या ठेकेदाराची चौकशी व्हावी, बावडा हद्दीत झालेल्या टोलनाक्याच्या बांधकामाची ग्रामपंचायत कार्याला कळवावे, असे निवेदनात म्हटले आहे