खाचरे तुंबली, कामे खोळंबली

भुकूम, ता. १६ : मुळशी तालुक्यात झालेल्या जोरदार अवकाळी पावसामुळे खाचरे पाण्याने तुंबली आहेत. त्यामुळे शेतकऱ्यांची पावसाळ्यापूर्वीची शेतीच्या मशागतींची कामे खोळंबली आहेत. तसेच, जोरदार वाऱ्यामुळे फळ पिकांचे मोठे नुकसान झाले आहे.
मुळशी तालुक्यात बुधवारी व गुरुवारी सलग दोन दिवस जोरदार पाऊस झाला. मुठा खोरे व भुकूम परिसरात पावसाचा जोर होता. पावसामुळे मुठा खोऱ्यात खाचरे तुडूंब भरली आहेत. त्यामुळे शेतीच्या मशागतीची कामे रखडली आहेत. पावसाळ्यापूर्वी खाचरात भाताचे रोप तयार करणे, त्यासाठी कुळवणी व पेटारणी करणे, बांधाला शिग देणे, सांडव्यांची दुरुस्ती करणे, शेणखताची वाहतूक करून ते खाचरात टाकणे, जनावरांसाठी वैरण रचून ठेवणे, झाडांची विरळणी करण्याची कामे रखडली आहेत. शिवारात ट्रॅक्टर जाऊ शकत नाही, अशी परिस्थिती झाली आहे.
जोरदार वारे व पावसामुळे आंबा, जांभूळ, फणस फळांचे मोठे नुकसान झाले. हापूस, पायरी, रायवळ आंब्याची झाडे उंच आहेत. जोरदार वाऱ्यामुळे अशा झाडांवरील फळे मोठ्या प्रमाणावर पडली आहेत. आंबा उतरणी करणे, आढी घालून पिकवणे, मार्केटला पाठवणे पावसामुळे शक्य होणार नाही.
दरम्यान, मुळशीतील आंबा हंगाम पंधरा मेपासून सुरू होतो. यावर्षी मोहोर कमी आला होती. त्यामुळे काही फळे लागली, ती वाऱ्यामुळे पडून शेतकऱ्यांचे मोठे नुकसान झाले आहे. तसेच, जांभळ फळांची अशीच अवस्था झाली आहे. आंबा, जांभळ, फणस यातून तालुक्याच्या पश्चिम भागातील शेतकऱ्याना दरवर्षी चांगले उत्पन्न मिळते. मात्र, अवकाळी पावसाने मोठे नुकसान झाले आहे.