पूरस्थिती कायम; सावधानेतचा इशारा

भुकूम, ता. २१ : मुळशी तालुक्यातील विना दरवाजे असलेले बंधारे भरून वाहू लागले आहेत. साध्या तालुक्यात मुसळधार पाऊस पडत असल्याने पूरस्थिती कायम आहे. त्यामुळे पाटबंधारे विभागाने नागरिकांना सावधानतेचा इशारा दिला आहे.
तालुक्यात मारणेवाडी, उरवडे, हाडशी (१), खांबोली, पिंपोळी, सालतर आणि रिहे या गावांमधील लघु पाटबंधारे विभाग अंतर्गत असणारे तलाव शंभर टक्के भरले आहे. सद्यःस्थितीत पावसामुळे या तलावांमधून नैसर्गिक प्रवाहाने अनियंत्रित पाणी विसर्ग सुरू झाला आहे. हे तलाव पाणी सोडण्यासाठी दरवाजाविना (Ungated) असतात, त्यामुळे पाण्याची पातळी कमाल मर्यादेला पोहोचल्यावर अतिरिक्त पाणी ओढे व नाल्यांद्वारे आपोआप खाली सोडले जाते. पुणे पाटबंधारे विभागाचे कार्यकारी अभियंता यांच्या वतीने जारी सूचनेनुसार, ओढ्यांच्या काठावर राहणारे नागरिक, शेतकरी व स्थानिक ग्रामस्थांनी जलप्रवाहाजवळ जाणे टाळावे, तसेच सतर्क राहावे.
सावधगिरीच्या सूचना लागू असलेली प्रमुख गावे: मारणेवाडी, उरवडे, हाडशी, खांबोली, पिंपोळी, सालतर, रिहे.
नागरिकांना सूचना: ओढे, नाले, व जलप्रवाहांच्या जवळ जाणे टाळावे. मुले, वृद्ध आणि जनावरे सुरक्षित स्थळी ठेवावीत. पाणी वाढल्यास तातडीने स्थानिक प्रशासनाशी संपर्क साधावा.

02557