भिगवण येथे अतिवृष्टीमुळे २० लाख रुपयांचे नुकसान

भिगवण, ता. २७ : येथे रविवारी (ता.२५) झालेल्या अतिवृष्टीमुळे सुमारे ७० घरांचे व १० व्यावसायिकांचे नुकसान झाले आहे. नुकसानग्रस्त भागातील घरांचे पंचनामे महसुल विभागाच्या वतीने मंगळवारी (ता.२७) करण्यात आले. अंदाजे पंधरा ते वीस लाख रुपयांचे नुकसान झाल्याचा प्राथमिक अंदाज व्यक्त करण्यात येत आहे.
येथे रविवारी(ता.२५) १६६ मिलिमीटर पाऊस झाला होता. पावसामुळे अनेकांच्या घरांमध्ये पाणी शिरल्यामुळे मोठे नुकसान झाले होते. नुकसानग्रस्त भागाची राज्याचे उपमुख्यमंत्री अजित पवार व क्रीडा व अल्पसंख्याक मंत्री दत्तात्रेय भरणे यांनी सोमवारी (ता.२६) पाहणी करून महसूल विभागास तातडीने पंचनामे करण्याच्या सूचना केल्या होत्या. त्यानुसार महसुल विभागाच्या वतीने मंडल अधिकारी डी.एस. कोकरे यांचे मार्गदर्शनाखाली गाव कामगार तलाठी आर.पी.देवरे, ग्रामविकास अधिकारी डी.बी.परदेशी आदींनी मंगळवारी(ता.२७) सकाळपासूनच पंचनामे करण्यास सुरुवात केली.यावेळी सरपंच गुराप्पा पवार, उपसरपंच सत्यवान भोसले व ग्रामपंचायत सदस्य उपस्थित होते. यामध्ये येथील सुमारे ७० घरे व १० व्यावसायिकांना अतिवृष्टीचा फटका बसल्याचे स्पष्ट झाले आहे. महसुल विभागाने पंचनामा करून त्याचा अहवाल पुढील कार्यवाहीसाठी सादर केला आहे.

दरम्यान, गाव कामगार तलाठी आर.पी. देवरे म्हणाले की, नुकसानग्रस्त घरे व व्यावसायिकांचे पंचनामे केले असून अहवाल पुढील कार्यवाहीसाठी सादर केला आहे.

01120