मदनवाडीत आलेल्या पुरात विद्युत मोटरी गेल्या वाहून

भिगवण, ता. २८ : मदनवाडी (ता.इंदापूर) येथील ओढ्याला आलेल्या पुरांमुळे येथील शेतकऱ्यांचे अतोनात नुकसान झाले आहे. प्राथमिक अंदाजानुसार सुमारे शंभर शेतकऱ्यांच्या विद्युत मोटारी पुराच्या पाण्यामध्ये वाहून गेल्या आहेत तर एकाच शेतकऱ्याचा शेतांमध्ये नुकताच काढून ठेवलेला चारशे पिशव्या कांदा वाहून गेला आहे.
मदनवाडी (ता.इंदापूर) येथील रविवारी (ता.२५) झालेल्या अतिवृष्टीचा सर्वाधिक फटका शेतकऱ्यांना बसला आहे. मदनवाडी गावातील वाहणाऱ्या ओढयावर अनेक शेतकऱ्यांच्या विहिरी तसेच विद्युत मोटारी बसविण्यात आल्या होत्या. रविवारी अचानक ओढायला पूर आल्यामुळे ओढ्यावर बसविण्यात आलेल्या सुमारे शंभरहून अधिक शेतकऱ्यांच्या विद्युत मोटारी पाण्यामध्ये वाहून गेल्या आहे. ओढ्याच्या शेजारी असलेल्या काही शेतकऱ्यांच्या विहिरीही गाळांने भरल्याचे चित्र येथे पहावयास मिळाले तर मदनवाडी येथील शेतकरी विकास ढवळे यांचा शेतामध्ये काढून ठेवलेल्या सुमारे चारशे पिशव्या कांदा पुराच्या पाण्यामध्ये वाहून गेला आहे. अनेकांच्या घरांमध्ये चार ते पाच फुटापर्यंत पाणी साठून राहिल्यामुळे गृहोपयोगी वस्तूंचेही मोठे नुकसान झाले आहे. दरम्यान, झालेल्या नुकसानीचे पंचनामे करण्याचे काम सुरू केले आहे. परंतु मदनवाडी ओढ्यावर करण्यात आलेल्या अतिक्रमणांमुळे ही स्थिती निर्माण झाली असून ओढ्यावरील सर्व अतिक्रमणे तातडीने हटविण्याची मागणी नुकसानग्रस्त शेतकऱ्यांनी केली आहे.