भिगवणला अपघातात दांपत्याचा वारीवरून परतत असताना मृत्यू

भिगवण ता. ६ : पुणे-सोलापूर राष्ट्रीय महामार्गावर येथील भिगवण ग्रामपंचायत कार्यालयासमोर सोलापूर बाजूकडून पुण्याकडे निघालेल्या दुचाकीस्वाराला भरधाव वाहनाने धडक दिली. यामुळे दुचाकीवरील पतिपत्नीचा मृत्यू झाला आहे. आषाढी वारीवरून गावी परतत असताना त्यांचे अपघाती निधन झाल्याबद्दल सर्वत्र हळहळ व्यक्त होत आहे.
मल्हारी बाजीराव पवार (वय ५७) व पंखाबाई मल्हारी पवार (वय ५० रा. दोघे येळपणे पोलिसवाडी, ता. श्रीगोंदा जि. अहिल्यानगर) असे अपघातामध्ये मृत्युमुखी पडलेल्या दांपत्याचे नाव आहे. याबाबत भिगवण पोलिसांनी दिलेली माहिती अशी, मल्हारी पवार व त्यांच्या पत्नी पंखाबाई पवार हे त्यांच्याकडील दुचाकीवरून (एम. एच. १६ ए.जी. २३४३) शनिवारी (ता. ५) आषाढी एकादशीनिमित्त विठ्ठल रुक्मिणी दर्शनासाठी पंढरपूरला गेले होते. रविवारी (ता. ६) सकाळी दर्शन करून ते त्यांच्या येळपणे येथे परत निघाले होते. सकाळी नऊच्या दरम्यान पुणे-सोलापूर राष्ट्रीय महामार्गावर भिगवण येथे त्यांच्या दुचाकीस भरधाव वेगातील अज्ञात वाहनाने धडक दिल्याने अपघात झाला. अपघातामध्ये मल्हारी पवार यांचा जागीच मृत्यू झाला तर पत्नी पंखाबाई पवार या गंभीर जखमी झाल्या होत्या. त्यांचा येथील खासगी रुग्णालयामध्ये उपचारादरम्यान मृत्यू झाला. अपघातानंतर वाहन चालकाने जखमींना मदत करण्याऐवजी वाहनासह पसार झाला.
अधिक तपास येथील भिगवण पोलिस ठाण्याचे साहाय्यक पोलिस निरीक्षक विनोद महांगडे यांचे मार्गदर्शनाखाली भिगवण पोलिस करीत आहे