भिगवण येथे आयटीआयला मान्यता

भिगवण, ता. ९ : येथील भिगवण शिक्षण प्रसारक मंडळ संचलित लोकनेते राजेंद्रकुमारजी घोलप औद्योगिक प्रशिक्षण संस्थेस (आयटीआय) राष्ट्रीय व्यवसाय प्रशिक्षण परिषद, नवी दिल्ली व महाराष्ट्र शासनाची नुकतीच मान्यता मिळाली आहे. विद्यार्थ्यांना चालू शैक्षणिक वर्ष २०२५-२६ पासून प्रवेश देणार असल्याची माहिती संस्थेचे अध्यक्ष अजित क्षीरसागर व प्राचार्य तुषार क्षीरसागर यांनी दिली आहे.
भिगवण हे गाव पुणे, सोलापुर व अहिल्यानगर जिल्ह्यांच्या सीमारेषांवर आहे. या जिल्ह्यांतील विद्यार्थ्यांचा येथे शिक्षण घेण्याकडे ओढा आहे. विद्यार्थी व पालकांची मागणी विचारात घेऊन येथील भिगवण शिक्षण प्रसारक मंडळाने आयटीआय मान्यतेचा प्रस्ताव राष्ट्रीय व्यवसाय प्रशिक्षण परिषद नवी दिल्ली व महाराष्ट्र शासनाकडे पाठविला होता. फेब्रुवारी २०२५ मध्ये नवी दिल्ली व मुंबई येथील तज्ज्ञांच्या समितीने या संस्थेस भेट देऊन वर्कशॉप, संगणक लॅब, यंत्रसामग्री आदी भौतिक सुविधांची पाहणी केली होती.
नुकतीच या समितीने आयटीआयला मान्यता दिली आहे. यामध्ये इलेक्ट्रिशियन (कालावधी २ वर्ष, २० विद्यार्थी), फिटर (कालावधी २ वर्षे, २० विद्यार्थी), कॉम्प्युटर ऑपरेटर अँड प्रोग्रॅमिंग असिस्टंट (कालावधी १ वर्ष, ४८ विद्यार्थी), जिओ इन्फर्मेटिक्स असिस्टंट (कालावधी १ वर्ष, ४८ विद्यार्थी) या अभ्यासक्रमास मान्यता मिळाली आहे.