तक्रारवाडीतील पाण्याच्या टाकीत सापाची पिल्ले आढळल्याचा दावा

भिगवण, ता. ११ : तक्रारवाडी (ता. इंदापूर) येथे पिण्याच्या पाण्याच्या टाकीत सापाची पिल्ले आढळून आल्याचा दावा एका नागरिकाने केला आहे. याबाबत ग्रामस्थांनी संताप व्यक्त केला असून असा प्रकार घडला नसल्याची शक्यता ग्रामप्रशासनाकडून व्यक्त करण्यात आली आहे.
तक्रारवाडीतील ग्रामस्थ बाळासाहेब गोडसे यांनी ग्रामपंचायतीच्या जलशुद्धीकरण केंद्रातून बाटलीमध्ये पिण्याचे पाणी घेतले होते. पाण्याची बाटली घरी घेऊन आल्यानंतर या बाटलीत सापाचे छोटे पिल्लू आढळून आले. त्यांनी बाटलीमध्ये सापाचे पिल्लू असलेला व्हिडिओ समाज माध्यमावर टाकत याबाबत माहिती दिली.
गोडसे म्हणाले की, पिण्याच्या पाण्यामध्ये सापाचे पिल्लू आढळले ही धक्कादायक बाब आहे. प्रशासनाने याबाबत योग्य ती काळजी घेण्याची आवश्यकता आहे.
उपसरपंच आशा जगताप म्हणाल्या, पिण्याच्या पाण्याची टाकी ठराविक कालावधीनंतर नियमितपणे स्वच्छ केली जाते. आषाढी एकादशीनिमित्त या टाकीची संपूर्ण स्वच्छता केली होती. त्यामुळे असा प्रकार घडणे अशक्य आहे. या प्रकरणामध्ये राजकारण असण्याची शक्यता आहे.