भिगवणच्या सात शाळांमध्ये आयडियल स्टडी अॅपचे वितरण

भिगवण, ता. ८ : रोटरी क्लब ऑफ भिगवणच्या वतीने भिगवण व परिसरातील सात शाळांमधील इयत्ता दहावीच्या विद्यार्थ्यांना आयडियल स्टडी शैक्षणिक ॲप मोफत देण्याचा निर्णय घेतला. नुकतेच येथील विठ्ठलराव थोरात इंग्लिश स्कूल, भैरवनाथ विद्यालय, आदर्श माध्यमिक विद्यालय, माध्यमिक विद्यालय वीरवाडी, क्षीरसागर विद्यालय, दत्तकला इंटरनॅशनल स्कूल, श्रीराम विद्यालय स्वामी चिंचोली (ता. दौंड) आदी शाळांमधील इयत्ता दहावीच्या विद्यार्थ्यांना ॲपचे वितरण करण्यात आले.
या वेळी रोटरी क्लब ऑफ भिगवणचे अध्यक्ष निखिल बोगावत, संस्थापक अध्यक्ष सचिन बोगावत, सचिव कुलदीप ननवरे, सदस्य संपत बंडगर, संतोष सवाणे, किरण रायसोनी, संजय खाडे, डॉ. अमोल खानवरे, रणजित भोंगळे, प्रवीण वाघ, प्रदीप वाकसे, बापूराव थोरात, महेश शेंडगे, विठ्ठल थोरात, नानासाहेब बंडगर, डॉ. प्रशांत चवरे उपस्थित होते.
यावेळी बोलताना रोटरी क्लब ऑफ भिगवणचे अध्यक्ष निखिल बोगावत म्हणाले की, ग्रामीण भागातील विद्यार्थी शैक्षणिक सुविधांअभावी वंचित राहत असल्याची बाब समोर आल्यानंतर रोटरी क्लब ऑफ भिगवणच्या वतीने सात शाळांमधील इयत्ता दहावीच्या विद्यार्थ्यांसाठी आयडियल स्टडी शैक्षणिक ॲप उपलब्ध करून दिले आहे. तीन भाषांमध्ये असलेल्या या ॲपमध्ये इयत्ता दहावीच्या सर्व विषयांच्या नोट्स प्रश्‍नपत्रिका उपलब्ध आहे. त्याचा विद्यार्थ्यांना निश्‍चित फायदा होईल.
कार्यक्रमाचे संयोजन विविध शाळांमधील शिक्षक तसेच रोटरी क्लब ऑफ भिगवणच्या सर्व सदस्यांनी केले. सात शाळांमधील विद्यार्थ्यांना शैक्षणिक ॲप मिळाल्यामुळे विद्यार्थी व पालकांनी समाधान व्यक्त केले.