अज्ञात वाहनाच्या धडकेने डिकसळमध्ये एकाचा मृत्यू

भिगवण, ता. १३ : भिगवण- राशीन रस्त्यावर डिकसळ (ता. इंदापूर) येथील योगेश्वरी लॉन्सच्या समोर मंगळवारी (ता. १२) रात्री साडेदहाच्या सुमारास अज्ञात वाहनाच्या धडकेने एकाचा मृत्यू झाला. अपघातानंतर वाहन चालकाने न थांबता निघून गेल्यामुळे संताप व्यक्त केला जात आहे. विजय सीताराम बांडे (वय ४२, रा. खेड, ता. कर्जत, जि. अहिल्यानगर), असे अपघातामध्ये मृत्यू झालेल्या व्यक्तीचे नाव आहे.
याबाबत पोलिसांनी माहिती दिली की, विजय सीताराम बांडे हे कामानिमित्त डिकसळ येथे आले होते. मंगळवारी (ता. १२) रात्री साडेदहाच्या सुमारास डिकसळ येथील योगेश्वरी लॉन्सच्या समोर अज्ञात वाहनाची त्यांना धडक बसली. या अपघातात गंभीर जखमी झाल्याने त्यांचा जागीच मृत्यू झाला. मात्र, अपघातानंतर वाहन चालक मदत न करता व खबर न देता निघून गेला.
या प्रकरणी संजय रामचंद्र मोरे (रा. लोहगाव, पुणे) यांनी भिगवण पोलिस ठाण्यात फिर्याद दिली. त्यावरून अज्ञात वाहन चालकाविरुद्ध गुन्हा दाखल केला आहे. याबाबतचा अधिक तपास भिगवण पोलिस ठाण्याचे सहाय्यक पोलिस निरीक्षक विनोद महांगडे यांच्या मार्गदर्शनाखाली सुरू आहे.