भिगवण पोलिसांच्या गस्तीत चोरटा अडकला जाळ्यात

भिगवण, ता. १८ : दिवाळीच्या पार्श्वभूमीवर चोऱ्यांना आळा घालण्यासाठी भिगवण (ता. इंदापूर) पोलिसांनी राबविलेल्या गस्त मोहिमेमध्ये संशयितरीत्या फिरणाऱ्या एका अट्टल चोरट्याला पकडण्यात यश आले. त्याने यापूर्वी चोरी केलेली एक लाख रुपयांची रक्कम पोलिसांनी हस्तगत केली. गणेश गंगाधर टिंगरे (वय ४४, रा. लोहार गल्ली, ता. कर्जत, जि. अहिल्यानगर), असे अटक केलेल्या चोरट्याचे नाव आहे.
भिगवण पोलिस ठाण्याचे सहाय्यक पोलिस निरीक्षक विनोद महांगडे यांनी दिवाळीच्या पार्श्वभूमीवर चोऱ्यांना आळा घालण्यासाठी गस्त पथकाची नेमणूक केली होती. पोलिस हवालदार महेश उगले, सचिन पवार, संतोष मखरे व शहाजी सुद्रीक हे अकोले (ता. इंदापूर) येथे गस्त घालत असताना एक संशयित व्यक्ती मोटार सायकलवरून परिसरामध्ये फिरताना आढळून आला. पोलिसांनी त्यास थांबवून चौकशी केली असता त्याने उडवाउडवीचे उत्तरे दिली. त्यानंतर पोलिसांनी त्यास ताब्यात घेऊन कसून चौकशी केली असता त्याने मोटार सायकल मिरजगाव (जि. अहिल्यानगर) येथून चोरी केली असल्याचे कबूल केले. तसेच, त्याने मदनवाडी (ता. इंदापूर) येथून सुमारे चाळीस हजार रुपये किमतीची पियाजो कंपनीची रिक्षा १३ ऑक्टोबर रोजी चोरी केल्याचे कबूल केले. पोलिसांनी त्यास अटक केले. त्याच्याकडून मोटार सायकल व पियाजो कंपनीची रिक्षा, असा एकूण एक लाख रुपयांचा ऐवज जप्त केला.
अधिक तपास येथील भिगवण पोलिस ठाण्याचे सहाय्यक पोलिस निरीक्षक विनोद महांगडे यांचे मार्गदर्शनाखाली भिगवण पोलिस करीत आहेत.