भोरमधील छाप्यांत २७ लिटर दारू जप्त

भोर, ता. २९ : शहरातील नागोबा आळी आणि पिराचा मळा परिसरातील विनापरवाना दारूविक्री करणाऱ्या तीनजणांवर भोर पोलिसांनी मंगळवारी (ता. २८) रात्री कारवाई केली. त्यांच्याकड़ून २७ लिटर गावठी हातभट्टीची दारू जप्त केली आणि त्यांच्याविरोधात गुन्हा दाखल केला. भोर पोलिसांच्या पथकाने मंगळवारी रात्री सव्वाआठ ते पावणेनऊ या वेळेत शहरातील दोन ठिकाणी छापे टाकले. त्यामध्ये सागर दशरथ धोंडे (वय ३५, रा. नागोबा आळी), हनुमंत सोपान मळेकर (वय ४०, रा. पिराचा मळा, भोर) आणि मंगेश हनुमंत चिकणे (वय ४२, रा. नागोबा आळी) या तिघांना गावठी दारुची विक्री करताना पकडले. त्यांच्याकडून २ हजार ७०० रुपयांची २७ लिटर गावठी हातभट्टीची दारू जप्त केली. त्यांच्यावर दारुबंदी अधिनियमानुसार गुन्हा दाखल केले.
भोरचे उपविभागीय पोलिस अधिकारी तानाजी बर्डे, भोरचे पोलिस निरीक्षक अण्णा पवार यांच्या मार्गदर्शनाखाली सहाय्यक पोलिस निरीक्षक दीप्ती करपे, पोलिस उपनिरीक्षक अनिल चव्हाण व पोलिस उपनिरीक्षक अशोक खुटवड यांनी पोलिस हवालदार उद्धव गायकवाड, विकास लगस, गणेश भिसे, अभय बर्गे यांनी ही कारवाई केली. पोलिसांनी तीनही आरोपींविरोधात गुन्हा दाखल केला. या गुन्ह्यांचा पुढील तपास पोलिस नाईक धर्मवीर खांडे व अतुल मोरे हे करीत आहेत.