निवंगण येथे गोठ्यात घुसून बिबट्याचा बैलावर हल्ला

भोर, ता. ८ ः निवंगण (ता.भोर) येथे बिबट्याने भरवस्तीतील घरातील गोठ्यात घुसून बांधलेल्या बैलावर हल्ला केला. हल्ल्यात बैल गंभीर जखमी झाला आहे. शुक्रवारी (ता.८) सकाळी सहा वाजता घडली.

भोर तालुक्याच्या नीरा-देवघर धरणाच्या दक्षिणेकडील हिरडस मावळ खोऱ्यात असलेल्या निवंगण येथील अलका डोईफोडे यांच्या घरात शुक्रवारी सकाळी सहा वाजता बिबट्याने प्रवेश केला. घरामध्ये वृध्द आजी आणि लहान मुले अंगावर पांघरून घेऊन झोपले होते. त्यांच्या बिछान्यावरून जाऊन बिबट्याने बाजूच्या पडवीत असलेल्या गोठ्यातील बैलावर हल्ला केला. परंतु, आजीला जाग आली आणि तीने आरडाओरडा केला. त्यावेळी बिबट्याने घाबरून धूम ठोकली. सुदैवाने बिबट्याच्या हल्ल्यात बैल दगावला नाही. अलका डोईफोडे यांनी निवंगण गावचे सरपंच राजू दिघे व माजी सरपंच किसन दिघे यांना सांगितली. त्यांनी घटनास्थळी जाऊन पाहणी केली आणि वनविभागाला घटनेची माहिती दिली. त्यानंतर वनविभागाच्या कर्मचाऱ्यांनी घटनास्थळी जाऊन पंचनामा केला. घरात घुसून बिबट्याने केलेल्या हल्ल्यात जखमी झालेल्या बैलाची भरपाई देण्याची मागणी ग्रामस्थांनी केली आहे.