भोरच्या स्वामी समर्थ मंदिरात गुरुपौर्णिमेनिमित्त कार्यक्रम

भोर, ता. २२ : गुरुपौर्णिमेनिमित्त शहरातील संजयनगरमधील श्री स्वामी समर्थ मंदिरात विविध धार्मिक कार्यक्रमांचे आयोजन करण्यात आले होते. यात होमहवन, अभिषेक, महापूजा आणि महाप्रसाद अशा प्रमुख कार्यक्रमांचा सहभाग होता. श्री स्वामी समर्थ मंदिर देवस्थानच्या वतीने रविवारी पहाटे पाच वाजल्यापासूनच धार्मिक कार्यक्रमांना सुरुवात झाली. मंदिराचे पुजारी व देखरेख करणारे मयूर रायरीकर व मुकुंद रायरीकर यांनी विधीवत धार्मिक कार्यक्रम केले. शहर आणि आसपासच्या गावांमधील अनेक भाविक स्वामी समर्थांच्या दर्शनासाठी आले होते. भर पावसातही सकाळी आठ वाजल्यापासून स्वामी समर्थ व तुळजाभवानी मातेच्या दर्शनासाठी भाविकांच्या रांगा लागल्या होत्या. प्रत्येक भाविकाला देवस्थान ट्रस्टच्या वतीने महाप्रसाद देण्यात आला. स्वामी समर्थांच्या सेवेकऱ्यांनी भाविकांच्या सेवेत सहभाग घेतला. सायंकाळी उशिरापर्यंत भाविकांनी दर्शनासाठी गर्दी केली होती.