भोरमधील एसटी सेवा रामभरोसे

भोर, ता. १९ : राज्य परिवहन महामंडळाच्या भोर आगारातील एसटीच्या सर्व बस जुन्या आणि वापरण्यास अयोग्य झाल्या आहेत. तरीदेखील त्या प्रवासासाठी वापरण्यात येत आहेत. त्यामुळे प्रवाशांच्या जिवाशी खेळ सुरु आहे. तालुक्याच्या वेळवंड खोऱ्यातील नागरिकांना आणि प्रवाशांचा शुक्रवारी (ता. १६) याचा प्रत्यय आला.
शुक्रवारी सायंकाळी वेळवंड खोऱ्यातील शिळींब येथे मुक्कामी जाणारी एसटी बस दोन वेळा बंद पडली. साडेसहा वाजता बारे गावाजवळ बंद पडलेली एसटी बस दुरुस्त करून पुन्हा मार्गस्थ केली. परंतु, पुढे गेल्यावर पसुरे गावाजवळ पुन्हा बंद पडली. त्यानंतर रात्री उशिरा दुसरी बस पाठवून प्रवाशांची सोय केली. परंतु, त्यामुळे नागरिकांना घरात पोहोचण्यास चार तास लागले. रस्त्यात रात्रीच्या वेळी बिबट्या आणि इतर प्राण्यांच्या भीतीने प्रवाशांची मात्र फार भंबेरी उडाली. त्यामुळे वेळवंड खोऱ्यातील पांगारी येथील नागरिक पंढरीनाथ राजीवडे यांनी ग्रामस्थांसमवेत भोरच्या आगार प्रमुखांना निवेदन दिले.
भोर तालुक्याच्या ग्रामीण भागात मुक्कामासाठी जाणाऱ्या एसटीच्या बस या चांगल्या दर्जाच्या पाठवाव्यात आणि प्रवाशांच्या जिवाशी खेळ थांबवावा, अशी मागणी वेळवंड खोऱ्यातील विविध गावांमधील नागरिकांनी केली. सद्यःस्थितीत एसटीच्या भोर आगारातील ९० टक्के बस या १० लाख किलोमीटरच्या पुढे धावलेल्या आहेत. त्यामुळे त्या वापरासाठी अयोग्य आहेत. परंतु, तरीही त्याच बस प्रवासासाठी वापरल्या जातात. यामुळे नागरिकांनी तीव्र शब्दांत नाराजी व्यक्त केली. पावसाळ्यापूर्वी सुस्थितीत गाड्या सुरु न केल्यास आंदोलन करण्याचा इशारा दिला.
याबाबत आगार व्यवस्थापकांशी संपर्क होऊ शकला नाही.