नांदघुर येथे बांबूपासून पॉलिहाऊसची निर्मिती

भोर, ता.२८ : भाटघर धरण खोऱ्यातील जयतपाड - नांदघुर येथे बांबूच्या प्रक्रिया केलेल्या काठ्यांपासून सुसज्ज पॉलिहाऊस उभारण्यात आले. शाश्वत शेती, पर्यावरणपूरक जीवनशैली आणि ग्रामीण अर्थव्यवस्थेला दिशा देणाऱ्या ‘द बांबू सेतू’ या अनोख्या बांबू शेत प्रकल्पामार्फत उपक्रम पूर्ण करण्यात आला.
यामध्ये बांबूच्या प्रक्रिया केलेल्या काठ्यांपासून उभारलेले पॉलिहाऊस हे कार्य एकात्मिक विकासाच्या दिशेने टाकलेले महत्त्वपूर्ण पाऊल मानले जात आहे. द बांबू सेतूच्या संस्थापक अनुराधा काशीद यांनी महाराष्ट्र बांबू प्रमोशन फाउंडेशनचे कार्यकारी अधिकारी व्ही. गिरिराज आणि गिरीश सोहनी यांच्या मार्गदर्शनाखाली हा प्रकल्प उभारला आहे. यासाठी वास्तुविशारद (आर्किटेक्ट) राजपाल सिंग आणि श्रीमती विनया वैद्य यांनी डिझाइन केले.

प्रकल्पाची प्रमुख वैशिष्ट्ये पुढीलप्रमाणे:
- संपूर्ण स्ट्रक्चर स्थानिक मेस जातीच्या प्रक्रिया केलेल्या बांबूपासून उभारले गेले आहे.
- क्षेत्रफळ : १००चौरस फूट
- शाश्वत शेती उपक्रमासाठी वापर- रोपवाटिका, भाजीपाला, फुले उत्पादन तसेच प्रशिक्षण उपक्रम, कृषिप्रदर्शन व इतर व्यावसायिक उपयोजनांची रचना.
- पूर्णतः स्थापत्य आणि पर्यावरणस्नेही दृष्टिकोन लक्षात घेऊन बांधले गेले आहे.
- यामुळे शेतकऱ्यांना आधुनिक तंत्रज्ञानासोबत स्थानिक संसाधनांचा वापर करून नवे उद्योग उभारण्यास मदत होणार आहे.