तीन अपत्य असल्याने पोलिस पाटील बडतर्फ

भोर, ता. ७ : वाकांबे (ता. भोर) येथील पोलिस पाटील विजय सुरेश ओंबळे यांना तीन अपत्ये असल्यामुळे पदावरून कायमस्वरूपी बडतर्फ करण्यात आले. भोरचे उपविभागीय अधिकारी डॉ. विकास खरात यांनी १ जुलै रोजी याबाबतचे आदेश दिले.
विजय ओंबळे हे डिसेंबर २०१७ पासून वाकांबे गावचे पोलिस पाटील म्हणून कार्यरत होते. परंतु, एका निवडणुकीच्या कालावधीत पोलिस पाटलांचे कर्तव्य पार पाडण्यात ते असमर्थ ठरल्यामुळे त्यांना सप्टेंबर २०२२ मध्ये निलंबित केले होते. तसेच, विजय ओंबळे यांना तीन अपत्ये असल्यामुळे त्यांना बडतर्फ करण्याची विनंती आनंदा भोमे यांनी उपविभागीय अधिकारी यांच्याकडे तक्रार अर्ज करून केली होती. त्यानंतर उपविभागीय अधिकारी यांच्या आदेशानुसार राजगड पोलिस ठाणे आणि तहसील कार्यालय यांनी तक्रारींबाबतचा अहवाल सादर केला. त्यामध्ये ओंबळे यांना तीन अपत्ये असल्याचे निदर्शनास आले. त्यामुळे उपविभागीय अधिकारी डॉ. खरात यांनी त्यांना शासकीय अधिनियमांचा भंग केल्यामुळे शासकीय सेवेतून कायमस्वरूपी बडतर्फ केले.