भाटघर धरण भरण्याच्या मार्गावर

भोर, ता. १५ : तालुक्यात सुरू असलेल्या जोरदार पावसामुळे भाटघर धरण भरण्याच्या मार्गावर आहे. पावसामुळे धरणातील पाणीसाठ्यात मोठ्या प्रमाणात वाढ झाली असून धरणात मंगळवारी (ता. १५) सायंकाळी ४ वाजेपर्यंत धरणात ८३.१० टक्के पाणीसाठा झाला आहे. गेल्या वर्षी याच दिवशी धरणात केवळ ३४. ९३ टक्के पाणीसाठा होता. असाच संततधार पाऊस सुरू राहिल्यास पुढील आठ दिवसांच्या आत धरण पूर्ण क्षमतेने भरण्याची शक्यता आहे.
नीरा धरण साखळीतील नीरा-देवघर, गुंजवणी आणि वीर या धरणातील पाणीसाठ्यातही वाढ होत आहे. नीरा धरण साखळीतील सर्वाधिक २२.७४ टीएमसी पाणीक्षमता असलेल्या भाटघर धरणात मंगळवारी ८३. १० टक्के पाणीसाठा झाला आहे. तालुक्यातील ११.९२ टीएमसी पाणीक्षमता असलेल्या नीरा-देवघर धरणात ६३ टक्के, तर राजगड तालुक्यातील ३.७ टीएमसी पाणीक्षमता असलेल्या गुंजवणी धरणात ६६ टक्के पाणीसाठा आहे. गुंजवणी धरणाच्या वीजनिर्मिती केंद्रातून २५० क्यूसेक ने पाण्याचा विसर्ग सुरू आहे. या तीनही धरणातून सोडण्यात येत असलेले पाणी पूर्वेकडील वीर धरणात जात असल्यामुळे वीर धरणात मंगळवारी ८८ टक्के पाणीसाठा झाला आहे. सद्यःस्थितीत वीर धरणाच्या डाव्या आणि उजव्या कालव्यातून १ हजार ८९९ क्यूसेकने पाण्याचा विसर्ग सुरू आहे. भाटघर, नीरा-देवघर आणि गुंजवणी धरणातून अद्याप विसर्ग झालेला सुरू नाही.