भाटघर धरणाच्या पाण्याला हिरवा रंग

भोर, ता. २१ ः तालुक्यातील भाटघर धरणातील पाण्याला हिरवा रंग आल्यामुळे स्थानिक नागरिकांमध्ये भीतीचे वातावरण निर्माण झाले आहे. मागील चार-पाच दिवसांपासून धरणातील पाण्याला हिरवा रंग दिसू लागला आहे.
धरणाच्या भिंतीच्या उत्तरेकडील बाजूला आणि उत्तरेकडील गावांच्या किनाऱ्यावर पाण्याचा रंग हिरवा दिसत आहे. सकाळी हिरव्या रंगाचा तवंग दिसतो आणि दुपारपर्यंत राहतो. धरणाच्या पाणलोट क्षेत्रातील संगमनेर, माळवाडी व नऱ्हे गावांच्या लगतच्या जलसाठ्यात हा बदल स्पष्टपणे दिसून येत आहे. धरणाच्या पाण्यावर भोर शहरासह अनेक गावांच्या पाणीपुरवठा योजना आहेत. त्यामुळे नागरिकांचे आरोग्य धोक्यात येण्याची शक्यता वर्तवली जात आहे. भाटघर धरणात मत्स्यसंवर्धन करण्यासाठी काही व्यावसायिकांना परवानगी दिली आहे. हे व्यावसायिक माशांना टाकत असलेल्या खाद्यामुळे पाण्याला हिरवा रंग येत असल्याचे नागरिक सांगत आहेत.
याबाबत जलसंपदा विभागाचे शाखा अभियंता गणेश ठेंगळे यांनी सांगितले की, माशांना टाकण्यात येत असलेल्या खाद्यांमध्ये नायट्रोजनचे प्रमाण जास्त असते. त्यामुळे पाण्यात शेवाळ वाढण्याची प्रक्रिया वेगाने होते. पाणी शांत असल्यावर ते किनाऱ्याला येते. पाण्याचा लाटा आणि पावसाचे प्रमाण वाढल्यानंतर शेवाळ साठत नाही. त्यामुळे दुपारनंतर धरणातील पाणी नेहमीप्रमाणे स्वच्छ दिसते.

शासनाच्या नियमानुसार भाटघर १५ ते १६ व्यावसायिकांना पिंजरा पद्धतीने मस्त्य संवर्धन करण्याची परवानगी दिली आहे. माश्यांसाठी टाकलेल्या खाद्यामुळे युट्रोफिकेशन होऊन पाण्याचा रंग हिरवा होतो. पाण्याला हिरवा रंग येण्यासाठी या एका कारणाशिवाय आणखी इतरही कारणे असतात. आम्ही या कारणांचा शोध घेण्याचे काम सुरू केले असून, पाण्याचे नमुने घेऊन तपासणीसाठी पाठवणार आहे.
-अर्चना शिंदे, सहाय्यक आयुक्त, मत्स्य व्यवसाय, पुणे